11 июня 2008 г.
Районти ял хуçалăх предприятийĕсен тĕп инженерĕсен канашлăвĕнче 2008 çулхи çурхи уй-хир ĕçĕсен кăтартăвĕсене пăхса тухнă тата инженерипе техника ĕçченĕсем умĕнче выльăх апачĕ пухса кĕртмелли техникăна ĕçе хатĕрлес тĕлĕшпе тăракан задачăсене сÿтсе явнă. Кунпа пĕрлех тракторсемпе вĕсен прицепĕсене техника тĕрĕслевĕ витĕр кăларнин малтанхи кăтартăвĕсем çинче чарăнса тăнă. Ял хуçалăх пайĕн техника ыйтăвĕсемпе ĕçлекен тĕп специалист-эксперчĕ В. Чаховский пĕлтернĕ тăрăх, майăн 30-мĕшĕ тĕлне выльăх апачĕ пухса кĕртмелли комбайнсен 59 проценчĕ, косилкăсен — 59, пресс-подборщиксен — 71, трактор кĕреплисен 63 прпоценчĕ юсавлă. Канашлу умĕн хуçалăхсене пăхса çаврăннă чух “Караевопа” “Нива”, “Гигантпа” “Досаево” хуçалăхсенче, В. Васильева хресчен-фермер хуçалăхĕнче выльăх апачĕ хатĕрлемелли техникăна юсас тĕлĕшпе ĕçсем пынă. “Красное Сормовора” вара ут çине хутшăнакан 3 агрегачĕ те юсавлă пулнă.
Патшалăх технадзорĕн органĕнче регистрациленĕ 258 трактортан майăн 30-мĕшĕ тĕлне 103-шне, 154 прицепран 28-шне техника тĕрĕслевĕ витĕр кăларнă, “Восток”, “Мичуринец” хуçалăхсемпе “Волит”, “Прогресс”, МТС пĕрлешÿсен, В. Васильева ХФХăн пĕр тракторпа прицепĕ те техника тĕрĕслевĕ витĕр тухман. Тĕрлĕ енĕпе йĕркене пăснăшăн 16 уйрăм çынна, 5 ертÿçĕне административлă майпа явап тыттарнă, 6,9 пин тенкĕлĕх штрафланă.
Ял хуçалăх предприятийĕсен тĕп инженерĕсене выльăх апачĕ пухса кĕртмелли техникăна çак кунсенче юсаса çитермелли, тĕрĕслев витĕр тухса допуск илмен агрегатсемпе ĕçлеме юраманни тата выльăх апачĕ хатĕрлес çĕрте ĕç сыхлавĕн правилисене çирĕп пăхăнса вăй хумалли, механизаторсен ĕçне çирĕп тĕрĕслесе тăмалли пирки ас илтернĕ.