06 июня 2008 г.
Чăваш Ен Президенчĕ Н. В. Федоров кăçалхи пуш уйăхĕн 22-мĕшĕнче иртнĕ район-хула пуçлăхĕсен Канашĕн тата Чăваш Республикин Президенчĕ çумĕнчи приоритетлă наци проекчĕсене пурнăçлас енĕпе ĕçлекен Канашăн пĕрлехи ларăвĕнче ял хуçалăх пĕлтерĕшлĕ пушă выртакан çĕрсене çаврăнăша кĕртес ыйтăва çивĕччĕн çĕклерĕ, должноçри яваплă çынсене ку енĕпе конкретлă хушусем пачĕ.
Статистика органĕсем тăратнă официаллă сведенисем тăрăх, çак евĕр çĕрсем пирĕн районта та 1972 гектар шутланаççĕ, çав шутран 1480 гектарне кăçал пусă çаврăнăшне кĕртмелле.
Ку тĕлĕшпе ĕçсем епле пыраççĕ-ха? Районти комисси (ăна район пуçлăхĕ С. А. Николаев ертсе пырать) çак тĕллевпе хальлĕхе Пикшик, Мăн Шетмĕ тата Еншик Чуллă тăрăхĕсенче тĕрĕслевсем йĕркеленĕ. Çу уйăхĕн 29-мĕшĕнче вара Трак енре пушă выртакан çĕрсене çаврăнăша кĕртнине тĕрĕслекен республикăри ĕç ушкăнĕн членĕсем пулчĕç. ЧР ветеринари тата фитосанитари надзорĕн федераллă службин Управленийĕн çĕрпе усă курнине тĕрĕслекен пай пуçлăхĕ В. Л. Шашкаров тата Раççей куçман пурлăхĕн ЧР Управленийĕн специалист- эксперчĕ А. С. Марков малтанах район администрацийĕн çуртĕнче ял хуçалăх предприятийĕсен ертÿçисемпе, ял тăрăхĕсен пуçлăхĕсемпе тата çĕр ыйтăвĕсемпе ĕçлекен специалисчĕсемпе курнăçрĕç, тухса каларĕç. Тĕл пулăва район пуçлăхĕ С. А. Николаев уçса йĕркелесе пычĕ.
Унтан ял хуçалăх пайĕн агрономи ыйтăвĕсемпе ĕçлекен тĕп специалист-экспертне В. А. Васильева сăмах пачĕç. Владилен Аркадьевич район çурхи пĕрчĕллĕ культурăсем акмалли плана пурнăçланине пĕлтерчĕ. “Досаево”, “Красное Сормово”, “Караево”, “Колос”, “Янмурзино”, “Шатьма” хуçалăхсем ака планне чылай ирттерсе тултарнă пулсан, “Новая силăра” (49,3 процент), “Мичуринецра” (55), “Волитра” (84) ку енĕпе тĕллевсене ĕçе кĕртеймен. “АиКо” хуçалăхра вара планпа пăхнă 500 гектар вырăнне пĕр гектар та акса хăварайман.
Çĕр улми районĕпе 586 гектар (план 549 гектар) лартнă, пур хуçалăх та çак енĕпе плансене тултарнă.
В. Васильев палăртнă тăрăх, кăçал çуркунне пусă çаврăнăшне планпа 380 гектар кĕртмелле пулнă пулсан, 501 гектар çине çуртрисем акса хăварнă, тĕллеве 134 процент пурнăçланă. Пушă выртакан çĕрсем çине кăçалах 1164 гектар кĕр тыррисем акса хăвармалла. “Алманч, Кĕçĕн Шетмĕ, Красноармейски, Упи ял тăрăхĕсенчи хуçалăхсенче халĕ çакна валли çĕр хатĕрлес ĕçсем пыраççĕ”, — терĕ Владилен Аркадьевич.
Тĕл пулура çавăн пекех Раççей куçман пурлăхĕн Чăваш Республикинчи Управленийĕн районсем хушшинчи 5-мĕш пайĕн тĕп специалист-эксперчĕ Г. Н. Никифорова тата район администрацийĕн çĕр тата пурлăх хутшăнăвĕсен секторĕн заведующийĕ В. В. Николаев тухса каларĕç.
Унтан республикăри ĕçлев ушкăнĕпе районти комисси членĕсем, ял хуçалăх предприятийĕсенче пулса ял хуçалăх пĕлтерĕшлĕ пушă выртакан çĕрсене çаврăнăша кĕртессипе вырăнсенче мĕнле ĕçлесе пынине тĕрĕслерĕç.