03 июня 2008 г.
Вăл Тăвай ялĕнче учитель çемйинче çуралнă. 1977 çултанпа Красноармейскинче пурăнать. Вера Васильевна 14 çул хушши райпо тытăмĕнче вăй хунă, 1993 çултанпа вара район администрацийĕнче тăрăшать. Халĕ — ЧР Сывлăха сыхлас ĕç тата социаллă аталану министерствин Красноармейски районĕнчи халăха социаллă хÿтлĕх паракан пайĕн ертсе пыракан специалист-эксперчĕ. В. В. Иванова малтан — кооператив техникумĕнчен, каярахпа Чăваш ял хуçалăх академийĕнчен вĕренсе тухнă. Хĕрпе ывăл çитĕнтернĕ. Халĕ, ав, мăнукĕпе те савăнать. Хисеплеççĕ, хаклаççĕ çак маттур та сатур, хастар та тăрăшуллă çынна пĕрле ĕçлекенсем. Çамрăкпа çамрăк пек, ватăпа ватă евĕр сăмахлама пĕлет вăл. Йывăр килсен, яланах пулăшма хатĕр Вера Васильевна.
Çулĕсем, ав, тытса чармалла марах малалла ыткăнаççĕ. Тем пекех каялла талпăнсан та, хăйсен уттинчен-чуппинчен никама та тăратса хăварасшăн мар вĕсем. В. В. Иванова та, ак, сисмесĕрех юбилейне тус-юлташĕсемпе, тăван-хурăнташĕсемпе пĕрле паллă турĕ. Ун ячĕпе çавна май ăшă вун-вун салам сăмахĕ янăрарĕ. Эпĕ те калатăп: Вера Васильевна, ялан çамрăк пулăр, уçă саслă та хаваслă кулă сăн-питрен нихăçан та ан кайтăр, ачăрсемпе тата мăнукăрсемпе савăнса пурăнăр.
Тăрăшулăхне кура В. В. Иванована район администрацийĕн Хисеп грамотипе те чысларĕç.