03 июня 2008 г.
Кăçалхи çур акин хăйне май уйрăмлăхсем пулчĕç. Нихăçанхинчен иртерех килчĕ вăл. Çапах та хресченшĕн питех те яваплă çак тапхăра йĕркеллĕ хатĕрленсе, çĕрсене вăхăтра тата пахалăхлă хуратса-шуратса хăвартăмăр. Кăçал, ытти çулхисемпе танлаштарсан, тĕш тырă культурисен лаптăкĕ кăшт пысăкрах пулчĕ — 777 гектар, çав шутран 165 гектарĕ — кĕр тыррисем. Çурт-рисен ытларах пайне — 362 гектар — “Эльф” урпа, тулă — 207, сĕлĕ — 47, пĕр çул ÿсекен курăксем 15 гектар йышăнчĕç. “Эльф” урпа вăрлăхĕ — пĕрремĕш репродукциллĕ тата элитăллă. “Московская-35” тулă 47 гектар элитăллă вăрлăхпа акрăмăр. Ку сорта пĕлтĕр супер элитăллăскере кÿрсе килсе 15 гектар çине варăнтарса хăварнăччĕ. Кăçал вара унăн лаптăкне виçĕ хут ÿстертĕмĕр. Шел, укçа-тенкĕ тивĕçменнипе тĕш тырăсене минераллă удобренисемсĕрех акма тиврĕ. Мĕн пур лаптăксене катоксемпе пусăрăнтарса тухнă. Çур акинче Сергей Степановпа Олег В. Иванов хăйсен икĕ сеялкăллă агрегачĕсене тухăçлă ĕçлеттерчĕç. Вĕсене Олег М. Ивановпа Геннадий Фомин механизаторсем пĕрер сеялкăллисемпе пулăшса пычĕç.
Çĕр хатĕрленĕ çĕрте Эдик Ивановпа Николай Федотов, Константин Фоминпа Радик Любимов хастарлăх кăтартрĕç. Эпир кăçал Владимир Иванов сварщик çине тăнипе КПЭ-4,2 культиваторсемпе икĕ енне 1-ер метр хушса çĕнĕ 2 хатĕр майлаштартăмăр. “Беларус 1221” маркăллă çĕнĕ тракторсем валли вĕсем чухах пулчĕç. Тăрăшни сая каймарĕ. Сарлакалатнă агрегатсем 3—4 трактора çăмăллăнах ылмаштарчĕç.
Халĕ, ытти çĕрти пекех, пирĕн патра та ĕç вăйĕ чакса пырать. Çавăнпах кăçал пахча çимĕç, выльăх кăшманĕ пĕр гектар та акман. Кăшманĕ ĕнесене питĕ кирлĕччĕ те, сĕт антарма пулăшать вăл. Анчах мĕн тăвăн, ăна кампа пăхса çитĕнтерсе пухса кĕртес?
Нумай çул ÿсекен курăксем ватăлса пыраççĕ. Вĕсене çĕнетес тесех кăçал тĕш тырăсемпе 100 гектар люцерна тата клевер акса хăвартăмăр.
“Иккĕмĕш çăкăр” кăçал 2 бригадăра — Карайпа Çырмапуçĕнче — 69 гектар йышăнчĕ. Ыттисенче ĕç вăйĕ тивĕçменнипех лартмарăмăр. Çĕр улмине Олег Ивановпа Геннадий Фомин механизаторсем лартрĕç.
Тĕш тырăсемпе çĕр улмине акса-лартса хăвартăмăр. Юлашки кунсенче çумăрсем ÿсен-тăрансене вăй илмелĕх нÿрĕкпе тивĕçтерчĕç. Халĕ вĕсене чипер пăхса çитĕнтерес, хурт-кăпшанкăсемпе кĕрешес тесе “иккĕмĕш çăкăр” пуссисене çак кунсенче титус препаратпа сапса тухасшăн, унтан — тĕш тырă калчисен лаптăкĕсене.
Çĕр çине ăшă аннипе усă курса, ĕне выльăхсем валли силослăх кукуруза 150 гектар акасшăн. Кун валли çĕрне хатĕрленĕ, СПН-8 çĕнĕ сеялка туяннă.
Тĕллев — акнă-лартнă лаптăксенчи культурăсене тĕрĕс-тĕкел пăхса çитĕнтерсе тухăçлă тĕш тырă, çĕр улми илесси, выльăх-чĕрлĕхе ытлăн-çитлĕн хĕл каçарма апат хатĕрлесси. Çавăншăн хуçалăхра хĕрÿ кĕрешÿ пырать те.