03 июня 2008 г.
Майăн 27-мĕшĕнче — Пĕтĕм Раççейри библиотекăсен кунĕнче — Янкасри тĕслĕх библиотекăра та хăйне евĕр уяв иртрĕ.
Кунта ялти ватă вулакансем пухăнчĕç. Вĕсем пурте ятарлă “Канлĕх” клуба çÿреççĕ. Хальхи занятинче библиотека ертÿçи Галина Ильина пирĕн çĕр-шывра çырулăх, пичет, кĕнеке кăларас ĕç, библиотекăсен историйĕсемпе паллаштарчĕ. Вырăнти сăвăç Николай Ершов салам сăввине вуларĕ.
Ун хыççăн ку темăпах викторина ирттерчĕç. Унти ыйтусене чылайăшĕ хăвăрт та тĕрĕс хуравсем пачĕç. Çавăншăн тата кĕнекесемпе яланах туслă пулнăшăн чи активлă вулакансем библиотека парнисене тивĕçрĕç. Çав шутра уйрăмах Воля Правдина, Анастасия Осипова, Юлия Николаева педагог-ветерансене палăртмалла. Чи ватти вара — 87 çулхи Фекла Иванова.
Юлашкинчен сенкер экран çинче Чăваш халăх артистки Елена Иовлева пултарулăхне кăтартакан видеокассетăна пăхса савăнчĕç, чей ĕçрĕç.