03 июня 2008 г.
Эпĕ хамăн мăшăрăн йăх-несĕл историйĕ çинчен каласа парасшăн. Вĕсем Куславкка районĕнче çуралнă, Муркар ялĕ. Ялта ватта Пуклак Йăванĕ тесе чĕннĕ. Хут çинче — Иван Максимов. Унăн ывăлĕ Александр Иванов 1870—1942 çулсенче пурăннă. Ялта вĕсене Шаник таврашĕ тенĕ. Александр мăшăрĕпе ултă ывăлпа пĕр хĕр çитĕнтерсе пурнăçăн анлă çулĕ çине кăларнă.
Аслă ывăлĕ Петĕр 1900 çулта çуралнă. Аслă Отечественнăй вăрçа хутшăннă. 1942 çулта хыпарсăр çухалнă. Вĕсем мăшăрĕпе Варварăпа (1902—1996 ç.ç.) виçĕ ывăлпа виçĕ хĕр çуратса ÿстернĕ.
Аслă хĕрĕ Нина (1926—1996) мăшăрне хĕр парнеленĕ. Люба (1928—2007) Шупашкарта ветеринари тытăмĕнче ĕçленĕ. Мăшăрĕ те ветеринари тухтăрĕ пулнă. Ывăлпа хĕрне те вĕсем аслă пĕлÿ панă. 1931 çулта çуралнă Юля хăйĕн кун-çулне тăван хуçалăхра ĕçлесе ирттернĕ, пĕр хĕр çитĕнтернĕ. Ывăлĕсенчен Николай чире пула 36 çултах çĕре кĕнĕ. Константин 1938 çулта çуралнă, Чăваш ял хуçалăх институтне вĕренсе пĕтернĕ, нумай çул агрономра, совхоз директорĕнче ĕçленĕ. Мăшăрĕпе ывăлпа хĕре пурнăçăн анлă çулĕ çине кăларнă. 1942 çулта кун çути курнă Владимир пединститутра вĕреннĕ, учитель дипломне алла илнĕ. Паянхи кун Чăваш ял хуçалăх академийĕнче ĕçлет. Мăшăрĕпе виçĕ хĕр çи-тĕнтернĕ.
Шаникăн иккĕмĕш ывăлĕ Виктор 1905 çулта çуралнă. Вăл иккĕмĕш тĕнче вăрçине хутшăннă, 1943 çулхи август уйăхĕнче Украинăна ирĕке кăларнă чух паттăрсен вилĕмĕпе пуçне хунă. Ăна Сума облаçĕнчи Ахтырка районне кĕрекен Куземе ялĕнчи тăванла масар çине пытарнă. Мрамортан тунă плита çинче Виктор Ивановăн ячĕ те пур. Çав сăваплă вырăна тăванĕсем кайса курнă.
Виктор çара кайичченех çемье çавăрнă, ял хĕрĕпе Настьăпа пĕрлешнĕ. Мăшăрĕпе виçĕ хĕр çитĕнтернĕ. Аслă хĕрĕ Людмила пединститут вĕренсе пĕтернĕ, ăна направленипе Новосибирск облаçне ĕçлеме яраççĕ. Кунта вăл Васино ял каччипе çемье çавăрать. Ывăлпа хĕр çитĕнтернĕ, вĕсем те мăшăрлă. Людмила Викторовна халĕ тивĕçлĕ канура, мăну-кĕсемпе киленсе пурăнать.
Вăталăх хĕрĕ — Лидия, манăн мăшăр. Вăл Канашри медицина училищине вĕренсе пĕтернĕ хыççăн хамăр район больницине ĕçлеме лекет. Каярах Лидия Викторовна ача-пăча сачĕн заведующийĕнче тăрăшрĕ. 1961 çулта эпир Лидийăпа пĕрлешсе çемье чăмăртарăмăр, хĕрпе икĕ ывăл çитĕнтертĕмĕр, пурне те аслă пĕлÿ патăмăр. Хĕрĕм хĕрлĕ дипломпа Хусанти культура институтне вĕренсе пĕтерчĕ. Володя ывăлăм Свердловскри архитектура институтĕнчен лайăх паллăсемпе вĕренсе тухрĕ. Халĕ мăшăрĕпе Шупашкарта пурăнаççĕ, хĕр çитĕнтереççĕ. Виталий Чăваш ял хуçалăх академийĕнчен инженер-механика вĕренсе тухрĕ. Ачасем пурте çемьеллĕ.
Викторăн виççĕмĕш хĕрĕ Нина Хусанти фармацевтика техникумĕнчен пĕлÿ илсе тухнă. Ăна Мăн Шетмĕри аптекăна ĕçлеме яраççĕ. Вăл кунта чылай çул заведующи пулса ĕçлет. Пăрăнтăк каччипе çемье тĕвĕлеççĕ. Хĕрпе ывăлне пурнăç парнеленĕ. Хĕрĕ, амăшĕ пекех, аптека ĕçне килĕштернĕ, Хусанти медицина институтне вĕренсе пĕтернĕ. Çар çыннине качча тухнă, Мускавра пурăнаççĕ, икĕ ывăл çитĕнтереççĕ. Нина Викторовнан ывăлĕ мăшăрĕпе Шупашкарта пурăнаççĕ.
Шаникăн виççĕмĕш ывăлĕ Мирон (1911—1992) Аслă Отечественнăй вăрçăра çапăçнă, офицер çыхăнуçă пулнă, капитана çити ÿснĕ. 1946 çулта вăрçă çулĕпе утса тухнă хĕрпе Австри çĕр-шывĕнче службăра тăнă чух çемье çавăрнă. Мăшăрĕ, Елизавета, Киров облаçĕнчен. Вĕсем виçĕ хĕр çитĕнтерсе пурнăçăн анлă çулĕ çине тăратнă. Аслă хĕрĕ Зинаида çемйипе Çĕнĕ Шупашкарта пурăнать. Светлана Канаш хулинче тĕпленнĕ. Людмила вара Белоруссин тĕп хулинче Минскра пурăнать.
Шаникăн тăваттăмĕш ывăлĕ Николай (1914—1988) иртнĕ вăрçа хутшăннă, иккĕмĕш рангри капитана çити ÿснĕ. Вăрçă вут-çулăмĕ тухиччен Н. Иванов шкулта ачасене вĕрентнĕ. Мăшăрĕпе хĕрпе ывăл çитĕнтернĕ. Вĕсем çемьеллĕ, Владивосток хулинче пурăнаççĕ.
Шаникăн пиллĕкмĕш ывăлĕ Константин (1917—1943) Аслă Отечественнăй вăрçăра паттăрсен вилĕмĕпе пуçне хунă, çемье те çавăрма ĕлкĕреймен. К. Иванов аслă лейтенант Курск хулине нимĕç фашисчĕсенчен ирĕке кăларнă чухне пĕр тан мар çапăçура ĕмĕрлĕхех куçне хупнă. Ăна Курск облаçĕнчи Головски районĕнчи Вишнеево ялĕнче пытарнă.
Шаникăн улттăмĕш ывăлĕ Алексей (1921—2008) кăçалхи январь уйăхĕнче пирĕнтен уйрăлса кайрĕ. Вăл та Аслă Отечественнăй вăрçăра çапăçнă. 1943 çулта йывăр аманать, ăна киле яраççĕ. Çав çулах вăл ял хĕрĕпе Любовь Павловнăпа çемье чăмăртать. Вĕсем 4 ывăл çитĕнтернĕ, кашниех аслă шкул вĕренсе пĕтернĕ.
А. Иванов ăста механизатор пулнă, ăна Чăваш АССРĕн аслă Совечĕн депутатне суйланă. Вăл “Хисеп палли” ордена тивĕçнĕ.
1943 çулта çуралнă аслă ывăлĕ Çурçĕр флотĕнче шыв айĕпе çÿрекен кимĕ çинче службăра тăнă. Иккĕмĕш ывăлĕ Шупашкарта пурăнать, ЧПУран вĕренсе тухнă, инженер-электрик специальноçне алла илнĕ.
Тепĕр ывăлĕ Мускав облаçĕнчи Химки хулинче тĕпленнĕ. Мăшăрĕпе иккĕшĕ те медицина ĕçченĕсем. Ачисем çĕр-шывăн тĕрлĕ кĕтесĕсенче пурăнаççĕ.
Çавăн пек çынсем вĕсем Шаникпа унăн ывăлĕсем. Ултă ывăлĕ те паянхи пурнăçшăн, таса тÿпешĕн Аслă Отечественнăй вăрçăра хастар çапăçнă, анчах виççĕшĕ вăрçă хирĕнчех выртса юлнă.