27 мая 2008 г.
Майăн 16-мĕшĕнче Чăваш Республикин Ял хуçалăх министерствин патшалăх вĕрентÿ учрежденийĕн Кÿкеçри вĕрентÿпе консультаци курсĕн районти филиалĕнчен 25 механизатор тракторист-машинист специальноçне илсе тухрĕ. Вĕсен хушшинче пĕртен пĕр хĕрарăм — Кĕçĕн Шетмĕри Лилия Андреева. Виçĕ уйăх çурă кунта пĕлÿ пухрĕç. Çав шутран пĕр уйăх та тепĕр эрне хушши ял хуçалăх предприятийĕсенче, фермер хуçалăхĕсенче ĕç практики ирттерсе, опыт пухрĕç.
Майăн 15-мĕшĕнче курсантсем теорипе экзамен панă: тракторпа агрегатсен тытăмĕ тата çул-йĕр правилисем енĕпе. Тепĕр кунне трактор çÿретессипе экзамен тытма тиврĕ вĕсен. Аттестаци комиссийĕ Сергей Иванович Мефодьевпа (вăл Çĕньял Чуракассинчен) Дмитрий Валерьевич Иванов (Кушкă), Андрей Николаевич Николаев (Хĕлеç) трактора çÿретме питĕ лайăх вĕренсе çитнĕ тесе палăртрĕ, вĕсем ку енĕпе чи лайăх паллă илчĕç. Экзамен тытакансен малтан тракторпа хапхаран тухма, унтан пĕр çаврăм туса, трактора каялла чакарса, прицеп çаклатма илсе пымалла, кайран ку вырăнтан тракторпа тухса хыçалалла уттарса хапхаран кĕмелле пулчĕ. Пĕтĕмĕшле илсен, ытларахăшĕ тĕрĕслев витĕр чиперех тухрĕ, çав вăхăтрах иккĕшĕн практика çителĕксĕрри куç кĕретех сисĕнчĕ.
Районти механизаторсен йышĕ хушăнчĕ, вĕсен чун кăмăлланă ĕçре ăнăçлă вăй хумалла пултăр.