27 мая 2008 г.
Обществăлла ĕç халăха ĕçпе тивĕçтерекен центрăн тĕп енĕсенчен пĕри пулса тăрать. Патшалăх çăмăллăхĕсем илекенсен шутĕнче ĕçпе тивĕçтерекен службăра тăракансем тата ĕçсĕр граждансем шутланаççĕ. Вăхăтлăх ĕçе килĕшекен çынпа ĕç паракан обществăлла ĕçе пурнăçлама вăхăтлăх ĕç килĕшĕвĕ тăвать.
Çак çынсем чи малтан патшалăх пулăшăвĕ илме тивĕç:
— ĕçсĕрлĕхшĕн пособи илмен çынсем;
— ĕçпе тивĕçтерекен центрта ултă уйăх ытла учетра тăракансем.
Енчен те эсир ĕç тупма пултараймастăр, сирĕн çемье укçа-тенкĕ енчен йывăрлăх тÿсет пулсан, сирĕн ĕçпе тивĕçтерекен центра пырса укçа тÿлекен обществăлла ĕçе вырнаçмалла.
Обществăлла ĕçсем сире хушма укçа кÿреççĕ, унта кашниех ĕçе вырнаçма пултарать. Обществăлла ĕçсен тĕсĕсем:
— ял хуçалăх ĕçĕсене ирттерни;
— кану тата туризм вырăнне çÿп-çапран тасатни;
— çулсене юсани тата тасатни;
— пурăнмалли çурт-йĕрпе коммуналлă хуçалăхра ĕçлени;
— Республика кунне ирттернĕ май, юсав ĕçĕсем йĕркелени;
— шкулсенчи лагерьсенче ачасен канăвне йĕркелени;
— ватă çынсене пăхса тăни.
Кăçалхи 5 уйăхра пирĕн патшалăх учрежденийĕ урлă 59 çын обществăлла ĕçе вырнаçрĕ. Вĕсенчен пĕри райцентрти Çĕнтерÿ паркне тасатас ĕçе хутшăнчĕ, улттăшĕ судсен приставĕнче тăрăшрĕç, пурăнмалли çурт-йĕрпе коммуналлă хуçалăхăн предприятийĕнче — 17, Красноармейски ял тăрăхĕнче 7 çын, ытти ял тăрăхĕсенче тăрăшрĕç. Çак тĕллевпе федераци бюджетĕнчен иккĕмĕш кварталта 54.900 тенкĕ уйăрнă, хальлĕхе 49.200 тенкине тăкакланă. Ку ĕçсем малалла пыраççĕ.