27 мая 2008 г.
Çумăр пĕрĕхкелесех тăнăран Красноармейскинчи 2-мĕш вăтам шкулти савăнăçлă уяв та акт залĕнче иртрĕ. Фанфарăсем янăранă хыççăн ăна директор çумĕ И. В. Кускова уçрĕ, çак мероприятие Çемье тата Ырă ĕçсен çулталăкне халалланине пĕлтерчĕ. Шкултан вĕренсе тухакан 44 яшпа хĕр зала кĕрсе вырнаçса ларнă май, район Гимнĕ янăрарĕ.
Унтан вун пĕрмĕшсене шкул директорĕ С. М. Гаврилова ăшшăн саламларĕ, экзаменсене ăнăçлă тытма ыр сунчĕ.
Юлашки шăнкăрав уявне хутшăннă район пуçлăхĕ С. А. Николаев шкул вĕренсе тухакансене тăван тăрăха, шкула, учительсене яланах асра тытма чĕнсе каларĕ, пурнăçри йывăрлăхсене пĕрле çĕнсе пымаллине палăртрĕ.
Малалла ашшĕ-амăшĕсен ячĕпе В. А. Богданов, пĕрремĕш класра вĕрентнĕ Н. Н. Павловапа А. В. Васильева педагогсем, 11-мĕш классен ертÿçисем В. А. Тихоновапа Н. В. Ефимова, шкул ачисем салам тата тав сăмахĕсем каларĕç, сăвă йĕркисем, ташăсем, шкул вĕренсе тухакансем вара учительсене чечексем парнелерĕç.
Кĕçех 1 класри Настя Петрова тата 11-мĕшĕнчи Иван Викторов панă шăнкăрав сассипе вун пĕрмĕшсем юлашки урока ларчĕç.