27 мая 2008 г.
Пĕрлехи информаци кунне хутшăнса район администрацийĕн финанс пайĕн ертÿçипе Р. А. Николаевапа Еншик Чуллă тăрăхĕнче пулма тÿр килчĕ. Вырăна çитсен пирĕн ушкăна ял тăрăхĕн пуçлăхĕ Г. Т. Васильев хутшăнчĕ, эпир чи аякри яла — Санькассине — çул тытрăмăр.
Мĕнле сывлать-ха паян 78 киллĕ Санькасси? Тÿрех каламалла: пурнăç уттинчен ÿксе юлмаççĕ ял çыннисем. Яла халĕ çатма евĕр асфальтлă çул илсе çитерет. Кăçалхи апрель уйăхĕнчен кунтан район центрне кунне 4 хут “Газель” йышши микроавтобус çула тухать. Çакăнта Вăрманкасри пĕр тăван Архиповсен — предпринимательсен — тÿпи калама çук пысăк. Пирвайхи рейс Красноармейски витĕр Карая çитичченех çул тытать, юлашкийĕ вара — Шупашкара. Куллен çула тухакансем, ватă-вĕтĕ çакăншăн савăнăçне пытараймаççĕ. Ĕлĕк çакă тĕлĕкри евĕр кăна курăннă-çке. Халĕ санькассисем, çĕньялсем, тĕрерсем палăртнă вырăна вăхăтра çитме пултараççĕ. Ял ватăлать, апла пулин те малашлăха пăхса пурăнакансем те сахал мар ку тăрăхра. Паян Санькассипе (4) Çĕньялтан (5) тăхăр ача Еншик Чуллă вăтам шкулне çÿрет, кăçал Çĕньялпа Вăрманкасра пĕрер ача çут тĕнчене килнĕ. Иртнĕ çул Санькассинчи кану çуртĕнче, фельдшерпа акушер пунктĕнче юсав ĕçĕсем ирттерме май килнĕ.
Информаци кунне килнисем, ял çыннисем шăпах вырăнти ФАПа пухăнчĕç. Вĕсене Н. Ф. Тимофеева заведующипе Р. А. Мефодьева санитарка (вăл ялти кану çуртĕнче çур ставкăпа ĕçлет) ăшшăн кĕтсе илчĕç. Пухăннисем умĕнче Р. А. Николаева тухса калаçрĕ. Информаци кунĕн теми анлă пулнă пирки вуншар цифра илсе кăтартрĕ Роза Александровна, ăна питĕ тимлĕн итлерĕç санькассисем. Республика ертÿçипе Правительство çамрăк çемьесене çурт-йĕр çавăрма пулăшас тĕллевпе чылай вăй хурать. Кăçалтан яла юлнă, ял хуçалăхĕнче ĕçлеме кăмăл тунă, ял хуçалăх предприятийĕпе 5 çуллăх килĕшÿ тунă çемьесене (вĕсенчен пĕрин 35 çула çитмелле мар) пулăшу уйăраççĕ. Иртнĕ çул авă районĕпе 8 миллион тенкĕне яхăн тĕрлĕрен субсиди панă. Çулленех ялсем патне пыракан çулсене, урамсене юртан тасатма йывăрлăх тухса тăрать. Кăçал çав тĕллевпе республикăран 2520 пин, вырăнти бюджетран 254 пин тенкĕ хушма укçа уйăрнă. “ЧР Президенчĕн “Таса шывпа тивĕçтерес тĕлĕшпе пурнăçламалли мерăсем çинчен” Указне пурнăçласа Еншик Чуллăра çĕнĕрен шыв пăрăхĕ хучĕç, халĕ ăна документсем хатĕрлесе Красноармейскинчи МУП ЖКХна памалла, унсăрăн ял тăрăхĕн пурлăх çине хуракан налук тÿлеме тивет”, — терĕ Роза Александровна.
Усă курман çĕрсене пусă çаврăнăшне кĕртес тĕлĕшпе те ĕçлемелли нумай еншикчуллăсен. Вăл районĕпе 1972 гектар шутланать пулсан, кунта — 130 гектар.
— Ял пурăнать-ха, — терĕ хăйĕн сăмахĕнче ял тăрăхĕн пуçлăхĕ Г. Васильев. — Пĕлтĕр, авă, килти хушма хуçалăха аталантарма ентешсем 4 миллион тенкĕ ытла ссуда илчĕç. Халĕ Санькассин тĕп урамне асфальт сарма проектпа смета докуменчĕсем хатĕрлетпĕр.
Геннадий Трифонович шыв ыйтăвĕ, çимĕк çывхарнă май, масарсенче тирпей-илем тумалли, ял уявĕсем ирттересси, çырăнтару тапхăрĕ пынă май, район хаçатне кашни çемьен çырăнса илмелли пирки чарăнса тăчĕ. Ыйтăвĕсем те сахал мар пулчĕç ял çыннисен. “Яла шывпа тивĕçтернĕ башня будки çунса кĕлленнĕрен паян ĕçмелли шывсăр ларатпăр. Юрать-ха çăлĕсем йĕркеллĕ ĕçлеççĕ”, — терĕ Л. Константинова.
Ялти ватăсен ушкăнĕ Красноармейскинчи райпо ертÿçисем эрнере икĕ хут автолавкка яма пулни, анчах хăйсен сăмахне тытманни пирки ÿпкелешсе калаçрĕç. “Юлашки вăхăтра çĕрпÿсем те килме пăрахрĕç, ĕлĕкхи пек çăкăрсăр ларатпăр”, — терĕç вĕсем.
Педагогика ĕçĕн ветеранĕ К. Афанасьев шыв налукне пуринчен те пуçтармалли, çĕнĕ çăлсем туса вĕсене пăхса тăмалли, субботниксем йĕркелемелли, тасалăх, предпринимательсене сутакан сĕт хакĕ пирки тухса калаçрĕ.
Ял çыннисем юлашкинчен хăйсене канăç паман çĕр ыйтăвĕпе хуравсем илчĕç.
Кăмăллă юлчĕç санькассисем тĕл пулупа.