27 мая 2008 г.
Çу уйăхĕн 19-мĕшĕнче район хăй тытăмлăх канашĕн черетлĕ ларăвĕ иртрĕ.
Ăна район пуçлăхĕ С. Николаев уçса йĕркелесе пычĕ. Вăл хăй тытăмлăх канашĕн членĕсене, çавăн пекех ларăва хутшăннă ял тăрăхĕсен пуçлăхĕсене, район центрĕнчи предприятисемпе организацисен тата учрежденисен ертÿçисене Чăваш Республикинчи муниципаллă йĕркелĕвĕн Канашĕн Шупашкар районĕнче çу уйăхĕн 16-мĕшĕнче иртнĕ пухăвĕн итогĕсем пирки каласа пачĕ. Кунпа пĕрлех районти хуçалăхсем, оперативлă даннăйсем тăрăх, çуртрисем акмалли тата çĕр улми лартмалли плансене ирттерсе пурнăçланине пĕлтерчĕ, юлашки вăхăтра халăх сывлăхне сыхлас çĕрте проблемăсем нумайланнине, вĕсене вара ним тăхтаса тăмасăр татса памаллине палăртрĕ.
Ларăвăн кун йĕркине кĕртнĕ икĕ ыйтупа та малалла район пуçлăхĕн социаллă ыйтусемпе ĕçлекен пĕрремĕш çумĕ, вĕрентÿ пайĕн пуçлăхĕ Н. Антонов тухса каларĕ. Вăл Çемье тата Ырă ĕçсен çулталăкне ирттермелли мероприятисен планĕсем мĕнле пурнăçа кĕрсе пынине тишкерчĕ. Акă, ку тĕллевпех район тата ял тăрăхĕсен сайчĕсенче ятарлă банерсем уçнă, мероприятисем пурнăçланнине райхаçатри рубрикăсенче çутатсах тăраççĕ. “Ачалăхшăн, ачалăх ячĕпе” ыр кăмăллăх марафонне хутшăнса, Трак енри ĕç коллективĕсем унăн фондне 100 пине яхăн тенкĕ хывнă. Шкулсенчи Тимур отрячĕсем хăйсен ĕçне вăйлатнă. Трак гимназийĕ — 130, Кĕçĕн Шетмĕ шкулĕ 85 килограмм япаласем пухнă, вĕсене йывăрлăх тÿсекен çемьесене параççĕ. Карайри Прокопьевсем ялти ватăсен çуртне ăшă тумтирсем леçсе панă. Красноармейскинчи газ участокĕ (ертÿçи Л. В. Филиппов) Чатукассинчи ватăсен çуртне 680 тенкĕлĕх чей куркисем парнеленĕ. “Единая Россия” партин Красноармейскинчи вырăнти уйрăмĕ ватăсен çурчĕсене — 100, районти тĕп библиотека (директорĕ С. А. Никитина) 300 кĕнекепе тивĕçтернĕ. Тулли мар яваплă “Минерал” пĕрлешÿ директорĕ В. Н. Васильев тата унăн мăшăрĕ — Уртем Гали поэтесса хаяр вăрçăра вилнĕ ентешсене асăнса Чатукассинче çĕкленĕ палăка çĕнĕ сăн кĕртме 102 пин тенкĕлĕх пулăшу панă. “Воддорстрой” пĕрлешÿпе Заволжски ЛПУМГ Трак гимназийĕнче юсав ĕçĕсем ирттерме пулăшу кÿнĕ. (Ку евĕр ырă тĕслĕхсем пирки райхаçатра та сахал мар çырчĕç, çыраççĕ те, — В. Д.). Унсăр пуçсăр “бриллиант” тата “ылтăн” туйсене пĕрле паллă тăвасси, çемьесен командисем хушшинче спорт ăмăртăвĕсем йĕркелесси тата ытти те, тата ытти те планпа килĕшÿллĕн пулса пырать. Пĕтĕмпех тунă, тăватпăр теме те май çук-ха пурпĕр. Ветерансен сывлăхне сыхлассипе, вĕсен медицина ыйтăвĕсене тивĕçтерессипе уйрăмах çителĕксĕр ĕçлетпĕр. “Ырă ырăпа таврăнать” тенине асрах тытасчĕ ку чухне”, терĕ Николай Илларионович ларура, Çемье тата Ырă ĕçсен çулталăкне ирттерессипе тăракан умри ытти задачăсем çинче те чарăнса тăчĕ.
Лару, информацине шута илнĕ май, ял тăрăхĕсен пуçлăхĕсен ку ыйтăва вырăнсенче тепĕр хут пăхса тухмаллине палăртса хăварчĕ.
Иккĕмĕш ыйтупа Н. Антонов “Вĕрентÿ” приоритетлă наци проектне пурнăçлассипе районти вĕрентÿ пайĕ мĕнле ĕçлесе пынине тĕрĕсленин акчĕпе тата палăртнă çитменлĕхсенчен хăтăлмалли мероприятисен планĕпе паллаштарчĕ.