27 мая 2008 г.
Çулленех майăн 27-мĕшĕнче кĕнеке юратакансемпе библиотека ĕçченĕсем Пĕтĕм Раççейри библиотекăсен кунне паллă тăваççĕ. Юлашки çулсенче библиотекăсене патшалăх енчен пулăшу нумай килет. Вулавăш çурчĕсене юлашки çулсенче пурне те тĕпрен юсанă, пĕтĕмпе 18 компьютерпа 15 телевизор вырнаçтарнă, çавăн пекех видеомагнитофонсемпе, ытти хатĕрсемпе пуянланнă, сканерсем ĕçлеççĕ. Çĕнĕ кĕнекесен шучĕ те кунсерен ÿссе пырать.
Библиотека ĕçĕ-хĕлĕ пур чухне те курăнмасть. Анчах унăн пĕлтерĕшĕ пуриншĕн те çав тери пысăк. Пирĕн тĕллев — вулакансен ыйтăвĕсене туллин те хăвăрт, пур енлĕн, паянхи пурнăç ыйтнă евĕр тивĕçтермелле. Халĕ библиотекăра ĕçлеме пачах та çăмăл мар, кунта вăй хуракансен кĕнекепе тивĕçтернисĕр пуçне мероприятине те ирттермелле, компьютерпа та ĕçлеме пĕлмелле, интернетпа та усă курмалла вулакансене право базисемпе паллаштармалла, электронлă каталогсем йĕркелесе пымалла. Унта ятарлă тата аслă пĕлÿ илнĕ çынсем кăна ĕçлеме пултараççĕ. Паян Трак енри библиотекăсенче 30-ăн ĕçлеççĕ, вĕсенчен 28-шĕ ятарлă тата аслă пĕлÿ илнĕ. Вулавăшсенче тăрăшакансем тăтăшах интереслĕ те тарăн шухăшлă мероприятисем ирттерме çине тăраççĕ, кашни библиотека çумĕнче тĕрлĕрен кружоксемпе клубсем йĕркеленĕ. Библиотека уйрăмах шкул ачисемпе тивĕçлĕ канурисем, учительсемпе студентсем, ял çамрăкĕсем валли юратнă вырăн пулса тăчĕ.
Обществăлла ĕçсенче те активлă пирĕн библиотекарьсем, тĕрлĕ шайри суйлав ĕçĕсене туса пынă чухне те хастар вĕсем. Районти чылай мероприяти библиотекарьсем хутшăнмасăр иртмест. Вĕсем ял тăрăхĕсен пĕрремĕш пулăшаканĕсем те. Уяв кунĕнче ĕçре маттур библиотекарьсене асăнмасăр май çук пулĕ, вĕсен шутĕнче: О. Николаева, С. Гурьева, Ю. Филимонова (тĕп библиотека), Е. Константинова (Упи), Р. Герасимова (Мăн Шетмĕ), О. Долгова (Алманч), Л. Федорова (Супар), Л. Волкова (ача-пăча библиотеки) тата ытти те.
Уява халалласа “Библиотекарь-2008” конкурс ирттертĕмĕр, унта пур библиотекарь те хутшăнчĕ.
Манăн уяв ячĕпе пирĕн тытăмра вăй хурса тивĕçлĕ канăва тухнисене, паян тăрăшакансене, вулакансене саламласа çапла калас килет:
Сăпайлăх, тĕрĕслĕх, ĕçченлĕх
Сирĕнпе пĕрле ялан.
Телей те çирĕп сывлăх, пĕрлĕх
Сире сунас килет чунтан.
Вăрăм кунç-çул, вăй-хал мехелĕ,
Ĕçре телей, çемье ăшши.
Паянхи кун уяв хĕвелĕ
Сунать вăл чун-чĕре ташши.