27 мая 2008 г.
Анатолий Леонидович Киселев юридически аслă пĕлÿ илнĕ. Вăл Красноармейскинче 1982 çулхи мартăн 29-мĕшĕнче çуралнă. Çемьеллĕ. Унччен Шупашкарта суд приставĕнче, район судĕнче ĕçленĕ.
Халь — 2007 çулхи декабрь уйăхĕнчен тытăнса, РФ прокуратура çумĕнчи следстви комитечĕн ЧР следстви управленийĕн Çĕрпÿри районсем хушшинчи следстви уйрăмĕн аслă следователĕ.
Майăн 20-мĕшĕнче Анатолий Леонидовичпа тĕл пултăм, темиçе ыйту çине хуравлама ыйтрăм.
— Сирĕн уйрăмăн тĕп тĕллевĕ мĕнре-ха?
— Вырăнлă ыйту. Пирĕн уйрăм уйрăмах йывăр тата йывăр преступленилле ĕçсене тĕпчесе, тĕрĕслесе тăрă шыв çине кăларассипе ĕçлет. Кусем çынсене юри (умышленное убийство) вĕлернипе, вĕсен сывлăхĕпе пурнăçне сиен кÿнипе, мăшкăлланипе, çынсен тата граждансен прависене хĕснипе, патшалăх влаçне хирĕçле тунă тата ытти йывăр преступленисене тĕрĕслесе суда çитерессипе çыхăннă. Çÿлерех асăннă преступленисенчен кашнинпех прокуратура уйрăмĕ ĕçлет. Хăшĕ-пĕрне тĕслĕхпе те çирĕплетме юрать. Акă, пĕлтĕр Янкас ялĕнче икĕ пенсионерка, иккĕшĕ пĕрле эрех ĕçнĕ хыççăн вăрçăнса, хирĕçсе кайнă. Çавăнпа та пĕри теприне алла лекнĕ çĕçĕпе 150 хут ытла ÿт-пÿн тĕрлĕ вырăнĕсенчен чикнĕ. Тата алла мĕн лекнĕ çавăнпа тапса-çапса пĕтернĕ. Инкек тÿсекенĕ, йывăр сурансене пула, çавăнтах вилсе кайнă.
Ку ĕç пирки виçĕ уйăх следстви ирттертĕмĕр. Районти суд кăçалхи апрелĕн 23-мĕшĕнче çын вĕлернипе пуçарнă уголовнăй ĕçе пăхса тухрĕ, айăпланакана ватлăх çулне тата вăл психика тĕлĕшĕнчен пăсăлнине шута илсе, республикăри пĕр психика стационарĕнче сипленмелле йышăну кăларчĕ.
Следстви уйрăмĕн тивĕçĕ — телефон çыхăнăвĕпе вырăнсенчен шăнкăравласа пĕлтернĕ вăл е ку ĕç пирки те следстви ирттерсе тĕрĕс йышăну кăларасси.
— Ытларах мĕн хумхантарать?
— Вăрттăнлăх мар ĕнтĕ, пирĕн пекех правона хÿтĕлекен ытти органсенче вăй хуракансене те, халь хамăр хушăра ĕçкĕ-çикĕпе иртĕхни шухăшлаттарать. Эрех-сăра тата ытти тĕрлĕрен хаяр шĕвек, суррогат çынсен ăс-тăнне çухатма пулăшаççĕ. Çавна пула, паллах, преступленилле ĕççсем тăвас çул çине тăраççĕ. Хăшĕ-пĕри, чылайăшĕ тесе калас килмест манăн, обществăлла йĕркелĕхе пăснă хыççăн, урăлсан ĕнтĕ хăй тĕрĕс мар çул çине тăнăшăн ÿкĕнет е “айăплă” тесе каçару ыйтма та пăхать. Анчах та “поезд” вырăнтан тапраннă ун чухне.
Ялсенче хăш-пĕр çынсем килĕсенче саккуна пăссах вăрттăнла майпа тĕрлĕрен хаяр шĕвек сутаççĕ. Кунашкал тĕслĕхсене кашни ялтах илсе кăтартма пулать.
Çакнашкал майпа ĕçленĕ-шĕн РФ Уголовнăй Кодексĕн 238-мĕш статйипе килĕшÿллĕн (“Таварпа продукцие хăруш-сăрлăх требованийĕсене пăсса сутнăшăн”) явап тыттараççĕ. Çавăншăн суд йышăннипе айăпласа 300 пин тенкĕ таран штраф параççĕ. Апла пулсан вăл е ку хаяр шĕвеке сутма юрать-и, юрамасть-и, çын сывлăхне сиенлеместĕп-и эпĕ тесе шухăшласа пăхмаллах.
— Анатолий Леонидович, вулакансене ыр кăмăллăх çулĕнче мĕн сĕннĕ пулăттăр?
— Чăн малтанах обществăра килĕшÿпе тату пурнăç суннă пулăттăм. Сывă пурнăç йĕркипе пурăнакан çынсемпе çемьесем татах йышланччăр. Çавăн чухне преступлени тăвасси те, çын вилесси те сахалланĕ.