27 мая 2008 г.
Елена Михайловна, ялти пек каласан, 78 çулхи Елька, хуйхи-суйхине чылай тÿснĕ. Мăшăрĕнчен — Мишăран — 28 çултах тăрса юлнă. Çумра икĕ пĕчĕк ача — Славикпе Фаина — юлнă. Шупуçне качча тухнăскер Малти Карăкра пĕр çурта сутăн илет. Хуллен-майĕпен, вăй çитерсе çав кил вырăнĕнчех çĕнĕ пÿрт ларттарать.
— Акă, халь çак кил-çуртрах ватăлтăм эпĕ. Мунчине те туса лартма пултартăм. Шăн-шăнах вăл, — хăйĕн кил-хуçалăхĕпе паллаштарчĕ Елька. — Анкартине те тухса пăхар.
Вăтам пÿ-силлĕ, пĕчĕкрех çан-çурăмлă хĕрарăм Е. Михайлова. Кăвак куçĕсем лăпкăн пăхаççĕ. Уксахлать.
— Ачасем хăйсем çемьеллĕ. Красноармейскинчен килсех çÿреççĕ. Славик ывăлăм, ав, пăрăх хывса пачĕ те пахча çимĕçе шăварма та меллĕ. Кишĕрĕсем епле тата шăтса тухрĕç. Помидорсене те, пĕр 15—20-шне, пленка айне лартса хăвартăм, — аллисемпе сĕлтнĕ май калаçать Елька. — Пăх-ха, улмуççисемпе крыжовниксемпе пуян манăн сад пахчи.
Улмуççисене хăех çитĕнтерет Елька. Икĕ çултан паха сортсемпе сыпăнтарать. Помидор, хăяр вăррисене те хăех хатĕрлет.
Виктори йăранĕ те пăхса ытарайми. Шап-шурă чечекре вăл.
— Вăт илем... Каллех хамах аппаланатăп унпа. Çырла тĕмĕсене çĕнетсех тăмалла. Тĕрĕссипе, çут çанталăк тухтăрĕ вырăнĕнчех ĕнтĕ эпĕ. Куллен садпа, анкартипе калаçатăп, — тет Е. Михайлова. — Чун-чĕре çапла хушать. Малти Карăкра Полевая урамра ларать унăн килĕ. 15-мĕш çурт... Çакăнта Елькан ывăлĕ — ялти пĕртен-пĕр пограничник Славик Михайлов — çуралнă. Амăшĕ каланă тăрăх, Китай чиккинче службăра пулнă сержант.
Мăшăрĕпе — Ленăпа — икĕ хĕр пăхса çитĕнтернĕ.