23 мая 2008 г.
Район администрацийĕн ял хуçалăх пайĕн начальникĕ Ю. Петров ертсе пыракан ушкăн, унта унсăр пуçне ЧР юстици министрĕн çумĕ М. Кузьмин, район администрацийĕн юридически пайĕн ертÿçи Л. Артемьев, вĕрентÿ пайĕн заведующийĕн çумĕ М. Голубев, шалти ĕçсен пайĕн çул çитмен ачасемпе ĕçлекен инспекторĕ М. Татмина кĕчĕç, ку хутĕнче “Нива” хуçалăхăн мехпаркĕнче, Кĕçĕн Шетмĕри тĕслĕх библиотекăра, врач офисĕнче, ялти вăтам шкулта пулчĕ, механизаторсемпе тата бригада ĕçченĕсемпе, медиксемпе, учительсемпе курнăçрĕ.
ЧР юстици министрĕн çумĕ М. Кузьмин Чăваш Республикин Президенчĕн “Чăваш Республикин 2009—2011 çулсенчи бюджет политикин тĕп çул-йĕрĕсем çинчен” Указĕ, территорисене тирпей-илем кĕртес, тавралăха сыхлас тата экологи, пурăнмалли çурт-йĕрпе коммуналлă хуçалăх тĕлĕшпе вырăнти хăй тытăмлăх органĕсен умĕнче тăракан задачăсем çинче чарăнса тăчĕ. Михаил Александрович XXIII Тĕнче кубокĕн малтанхи кăтартăвĕсемпе паллаштарнă май, кĕçĕншетмĕсене, асăннă ăмăртура ку тăрăхран тухнă 2 спортсмен — Эдикт Хайбуллинпа (Кĕçĕн Шетмĕ) Людмила Архипова (Дубовка) Раççей чысне хастар хÿтĕленĕ ятпа саламларĕ.
Ял хуçалăх пайĕн начальникĕ Ю. Петров районта “АПК аталанăвĕ” наци проектне мĕнле пурнăçа кĕртсе пынипе, усă курман çĕрсене пусă çаврăнăшне кĕртнипе, районти шалти ĕçсен пайĕн çул çитмен ачасемпе ĕçлекен инспекторĕ М. Татмина Трак енре право йĕркисене пăсассинчен асăрхаттарассипе епле тăрăшнипе, вĕрентÿ пайĕн заведующийĕн çумĕ М. Голубев вĕрентÿ коллективĕсен умĕнче тăракан задачăсемпе паллаштарчĕç, граждансен чылай ыйтăвĕсене хуравларĕç. Кĕçĕн Шетмĕ ял тăрăхĕн пуçлăхĕ О. Андреева çĕр пайĕсемпе куçман пурлăх обăекчĕсене регистрацилес ĕçе хăвăртлатма сĕнчĕ.
Ку тăрăхри халăхăн ыйтусем чылай пухăнса кайнă. Тĕс-лĕхрен, нумайăшне ялти врач офисĕ халăха эрнере виçĕ кун çеç йышăнни, ытти кунсенче кунти медицина специалисчĕсен аякри ялсене тухса çÿресе унти çынсене пулăшу пама тивни тивĕçтерсех каймасть. Ялта унта та кунта кĕленчесем йăванса çÿренипе те кăмăлсăр вĕсем. “Райпо мĕншĕн эрех кĕленчисене пухассине йĕркелемест?” — тилмĕрсех ыйтать Вячеслав Горшков.
Çавăн пекех, Кĕçĕн Шетмĕ шкул директорĕн хуçалăх ыйтăвĕсемпе ĕçлекен çумĕ Ю. Пирошкин, В. Горшков слесарь, Н. Афанасьев пенсионер, В. Афанасьев учитель тата ыттисем хуçалăхсемпе çынсенчен илекен сĕт хакĕ çав тери йÿнелсе кайнишĕн, çăкăр вара хакланнăшăн çав тери пăшăрханса калаçрĕç. Çÿлти органсенчен ку енĕпе тивĕçлĕ мерăсем йышăнма ыйтаççĕ вĕсем.
— Çу кунĕсенче, уйрăмах шăрăх çанталăкра, Кĕçĕн Шетмĕре ĕçмелли шыв пачах пĕтсе ларать, — ÿпкелешрĕç Николай Андреев механизаторпа В. Горшков тата ыттисем.
Ванюшкасси бригадирĕ А. Платонов шкул ачисене хăйсен ялĕнчен турттарма шкул автобусне уйăрманни, çитес вĕренÿ çулĕччен ку ыйтăва вăраха ямасăр татса памалли пирки тепĕр хут ас илтерчĕ.
Пĕр сăмахпа каласан, Кĕçĕн Шетмĕри курнăçусем икĕ еншĕн те усăллă иртрĕç. ЧР юстици министрĕн çумĕ М. Кузьмин ку тĕл пулусенче çĕкленĕ хăш-пĕр ыйтусене çÿлти органсене çитерсе татса пама пулăшма шантарчĕ.