23 мая 2008 г.
Çу уйăхĕн 21-мĕшĕнче Трак енре те, ытти çĕрти евĕрех, черетлĕ Пĕрлĕхлĕ информаци кунĕ иртрĕ.
Çав кун ирхине район пуçлăхĕ С. Николаев, ЧР культура, национальноçсен ĕçĕсен, информаци политикин тата архив ĕçĕн министрĕ Р. Лизакова тата “Хыпар” издательство çурчĕ” патшалăх унитари предприятийĕн генеральнăй директорĕ-тĕп редакторĕ А. Леонтьев халăх пултарулăхĕн районти çуртĕнче ял тăрăхĕсенчи культура учрежденийĕсенче вăй хуракансемпе тата библиотекарьсен пĕр ушкăнĕпе тĕл пулчĕç. Тĕл пулăва уçнă май, Станислав Андреевич информаци кунĕсен пĕлтерĕшĕ пысăккине, вĕсенче халăх çĕклекен ыйтусене пурне те тĕплĕн шута илнине, май пур таран татса пама çине тăнине каларĕ. Калăпăр, яманаксем тĕл пулу-пухусенче плотинана юсамаллине çине-çинех аса илтерчĕç, ку тĕллевпе район бюджетĕнчен малтанлăха 320 пин тенкĕ уйăрса пачĕç.
Р. Лизакова министр, информаци кунĕн темисене çутатнă май, ялти культура ыйтăвне çивĕччĕн çĕклерĕ. “500 тĕслĕх библиотека уçрăмăр республикăра. Ытти регионсенче ку евĕр опыт çукран çăмăл тивмерĕ. Халĕ вара ялти клуб учрежденийĕсене модернизацилес тĕллев тăрать. Клуб ертÿçисем хушшинче чăн-чăн лидерсем сахалтарах. Кадрсене вĕрентсе хатĕрлесси, вĕсен квалификацине хăпартасси тĕпре пулмалла. Ялта культура учрежденийĕ мĕнле вырăн йышăннине тепĕр хут тишкермелле. Паха опыта вĕренсе алла илмелле. Çынсемпе малашлăха курса тăрса ĕçлесси тĕпре пулмалла”, — терĕ Роза Михайловна.
Культура аталанăвĕн ыйтăвне “Хыпар” хаçатăн тĕп редакторĕ А. Леонтьев та çĕклерĕ. “Тĕслĕх библиотекăсенче чăваш хаçачĕсем пулмаллах. Хальлĕхе вара?.. Тĕп хаçатсем те çук-ха. Культура пĕрремĕш вырăнта тăмалла, унăн пĕлтерĕшĕ анлă. Çамрăксем хаçат-журнал вулассинчен пăрăнма тытăнчĕç. Çавна май “Хыпар” хаçат тиражĕ те пĕчĕкленме тытăнчĕ. Çырăнтару ĕçне унчченхи шайран чакарас марччĕ. Ку енĕпе сирĕнтен те пулăшу кĕтетпĕр”, — палăртрĕ Алексей Петрович.
Тĕл пулура районти централизациленĕ библиотека тытă-мĕн директорĕ С. Никитина “Хыпар” хаçата 11 тĕслĕх библиотека çырăннине, тĕп библиотекăна çак кунсенче çеç чăваш кĕнекисем пĕтĕмпе 19 пин тенкĕлĕх килнине каларĕ. Кĕçĕн Шетмĕ кану центрĕн директорĕ В. Петрова ялти Э. М. Юрьев ячĕллĕ музей-ÿкерчĕксен галерейине уçма пулăшу кирлине палăртрĕ, “Клубный вестник” хаçат шăпипе, культработниксене стажшăн тÿлессипе интересленчĕ.
Унтан Р. Лизакова министрпа район администрацийĕн социаллă аталану секторĕн заведующийĕ В. Лукин Кĕçĕн Шетмĕпе Чатукасси ял тăрăхĕсенчи культура учрежденийĕсенче пулчĕç. Район пуçлăхĕпе С. Николаевпа “Хыпар” хаçат редакторĕ А. Леонтьев вара тулли мар яваплă “Таябинка” агрофирма пĕрлешĕве çитрĕç, ĕç тăвакан А. Афанасьев директорпа, С. Молотков тĕп агрономпа, кунта вăй хуракансемпе курнăçрĕç, информаци кунĕн темипе тухса каларĕç. Пĕрлешÿре кăçал, сăмах май, çĕр улми 200 гектар (пĕлтĕр 155 пулнăччĕ) лартса хăварнă, кĕр тыррисем — 830, çуртрисем 925 гектар йышăнаççĕ. Ку коллективра Малти Карăк ялне çитерекен çула тăвассине вĕçлессипе çыхăннă ыйтăва çĕклерĕç.
Кăнтăрла иртсен Станислав Андреевичпа Алексей Петрович Красноармейскинчи почта çыхăнăвĕн çуртĕнче кунта ĕçлекенсемпе тата ялсенчи çыхăну уйрăмĕсен пуçлăхĕсемпе курнăçрĕç. Калаçу, тĕпрен илсен, хаçат-журнал çырăнтарассине лайăхлатасси пирки пычĕ. “Малалла алла-аллăн тытăнса ĕçлер ку енĕпе”, — палăртрĕ “Хыпар” хаçат редакторĕ. Кунти тĕл пулăва Çĕрпÿри почтамт пуçлăхĕн çумĕ Л. Николаева тата çырăнтару енĕпе ĕçлекен Р. Ельмакова инструктор та хутшăнчĕç, сăмах каларĕç.