23 мая 2008 г.
Çу уйăхĕн 19-мĕшĕнче район администрацийĕ çумĕнчи санитарипе эпидемие хирĕç кĕрешекен (халăх сывлăхне сыхлас енĕпе ĕçлекен) комиссин кăçалхи пĕрремĕш ларăвĕ пулчĕ.
Унта комисси председателĕ, район пуçлăхĕн социаллă ыйтусемпе ĕçлекен, пĕрремĕш çумĕ Н. И. Антонов йĕркелесе пынипе пурĕ 5 ыйту пăхса тухрĕç. Чи малтанах çак комиссин кăçалхи ĕç планне тишкерсе çирĕплетрĕç. Унтан Раççей потребнадзорĕн ЧР управленийĕн Çĕрпÿ районĕнчи территори уйрăмĕн специалист-эксперчĕ Н. Н. Васильева сывлăха сыхлас ĕç тытăмĕнчи приоритетлă наци проектне Красноармейски районĕнче пурăнакансене хушма иммунизацилессине мĕнле пурнăçланипе паллаштарчĕ. Паллă ĕнтĕ, çакă инфекци чирĕсем ерессинчен асăрхаттарма май парать. Ав, пĕлтĕр хушма иммунизацилессипе килĕшÿллĕн грипп чирне хирĕç 2500 çын ÿтне вакцина янă (89,9 процент), çав шутра 101 медработник, вĕрентÿ учрежденийĕсенче ĕçлекенсем 267-ĕн, 60 çултан иртнисем 759-ăн, ача садне çÿрекенсем 108-ăн, 1—11 классенче вĕренекенсем 1265-ĕн. Çавна май гриппа чирлесси иртнĕ çул 2,4 хут чакнă.
Кăçалхи февраль — апрель уйăхĕсенче ку енĕпе санитари законодательствине епле пăхăннине палăртас тĕллевпе планпа пăхнă мероприятисем йĕркеленĕ. Уйрăм çитменлĕхсем пуррине те тупса палăртнă. ФАПсемпе врач офисĕсенче, ача сачĕсемпе шкулсенче, поликлиника çумĕнче, сăмахран, прививка тумалли уйрăм пÿлĕмсем пăхман. Хăш-пĕр ФАПсенче профилактикăлла прививкăсене тасалăхпа килĕшсе тăман условисенчех тăваççĕ, сивĕ тата вĕри шыв та, канализаци те çук вĕсенче. “Райцентрти шкулсенче медработник штачĕ çукки те — пысăк проблемăсенчен пĕри”, — палăртрĕ Наталья Николаевна.
Ку ыйтупах сывлăх сыхлавĕн “Красноармейски тĕп больници” муниципаллă учрежденийĕн тĕп врачĕн ĕçĕсене туса пыракан Г. Н. Сушко сăмах каларĕ. Вăл çитменлĕхсенчен хăтăлма мероприятисен планне хатĕрленине, çывăх вăхăтрах холодильниксем, ытти медоборудовани туянмаллине палăртрĕ. З. Ф. Порфирьева врачпа Л. В. Перепелкина медсестра та çак енĕпе хăйсен шухăшĕсене каларĕç.
Информацине шута илнĕ май, лару ку тĕлĕшпе пурнăçа кĕртмелли ĕçсене кăтартса хăварчĕ.
Ларура грипп чирĕн массăллă эпидемийĕ вăхăтĕнче сиплевпе профилактика учрежденийĕсене тивĕçтермелли ресурссем çинчен райбольницăри инфекци уйрăмĕн заведующийĕ З. З. Баранова, ачасен çуллахи канăвĕпе сиплевне хатĕрленесси мĕнле пыни пирки вĕрентÿ пайĕн специалисчĕ Т. В. Викторова пĕлтернисене итлерĕç, тивĕçлĕ йышăнусем турĕç.
Юлашкинчен комисси членĕсем 2008—2010 çулсенче Красноармейски районĕнче паразит чир-чĕртен асăрхаттармалли мероприятисен ведомствăсем хушшинчи комплекслă планне пăхса тухса çирĕплетрĕç.