23 мая 2008 г.
Хĕветĕрпе иксĕмĕр пĕр урамрах пурăнатпăр. Иксĕмĕр те Маруçа юрататпăр. Маруç Хĕветĕртен кĕçĕнрех, манран аслăрах.
Эпĕ — купăсçă та. Купăс пĕрмине тăсса ятăм анчах, ташша Хĕветĕр вирхĕнсе тухрĕ. Маруç умне пырса тăпăртатрĕ. Маруçпа Хĕветĕр ташлама пуçласан, купăса аяккалла ывăтса ярас килчĕ. Хăвăн чун савнине, купăс каласа, каччăпа ташлаттарни ăшă пÿртре çемçе пукан çинче каçăрăлса телевизор пăхса ларасси мар!
Каçхине мана урамра Хĕветĕрпе Улюш арăмĕ, Маруç инкĕшĕ, Хĕветÿç акай, хирĕç пулчĕç. Вĕсенчен: “Ăçта каяççĕ-ши çĕр хута?” — тесе тăрса юлтăм. Вĕсем тăкăрлăкран иртрĕç те, тÿрех Маруçсем патне кĕчĕç. Каккуй кайса çывăрма та! Калаçнине илтсен, Маруçсен лаçĕ çумне пырса тăтăм. Сĕтел çинче эрех кĕленчисем курăнаççĕ.
— Маруç, килĕшех, Хĕветĕр пек каччă урăх ăçта тупăн? Аллисем ылтăн! — терĕ Хĕветÿç акай.
Çав каç Маруçа çураçрĕç. Ку мана кĕвĕçтерчĕ те, пăшăрхантарчĕ те. Мĕн тăвăн? Аптранипе Маруçсен сарай хыçĕнчи чи тутлă пан улмисене пĕр хĕв киле татса таврăнтăм.
Ялта килĕрен туй çÿрерĕ. Пирĕн пата та кĕчĕç. Эпĕ çĕнĕ мăшăр умне пысăк чашăкпа хĕрлĕ пан улмисем пырса лартрăм. Маруç пĕрне ас тиврĕ те, мана куçран чăр! пăхрĕ.
— Сирĕн пан улми вăл. Сана çураçнă каç... — терĕм ăшра.