20 мая 2008 г.
Çу уйăхĕн 15-мĕшĕнче, Пĕтĕм тĕнчери çемье кунĕнче, районти ЗАГС пайĕпе Красноармейски ял тăрăхĕнче ĕçлекенсем Вутланти хисеплĕ мăшăра — Софроновсене — “бриллиант” туйпа ыр сунчĕç.
1947 çулта Иван Софронович, хаяр вăрçă вутне те кĕнĕскер, тăван яла таврăннă. Тепĕр çулхи ака уйăхĕн 3-мĕшĕнче ялти хитре хĕрпе — Анжелика Сидоровнапа — çемье çавăрнă. 60 çул иртрĕ унтанпа. Халĕ те шăкăл-шăкăл калаçса пурăнаççĕ. Иван Софронович паспорт сĕтелĕн тата “Союзпичет” уйрăмĕн пуçлăхĕсенче, мăшăрĕ вара районти обществăлла апатлану тытăмĕнче вăй хунă, иккĕшĕ те “Ĕç ветеранĕ” ята тивĕçнĕ. Тăватă хĕр çитĕнтерсе çын тунă вĕсем.