20 мая 2008 г.
Ăçтарах-ши Малти Карăк? Красноармейскипе юнашарах, Мăн Шетмĕ юхан шывĕ хĕрринче вырнаçнă вăл. Виçĕ урам пĕчĕк ялта. Пĕтĕмпе 40 киле яхăн. Çĕр çын ытла пурăнать Малти Карăкра.
— Хаçат-журнал вулама юратать ку ял. Чылайăшĕ райбиблиотекăна та çÿрет. “Ял пурнăçĕ” хаçата вара 18 килте çырăнса илнĕ, — тет кăмăллăн Светлана Сергеевна Маркова почтальонка. — Район хыпарçине çулленех çырăнса илекенсемпе паллаштарам-ха...
Паллах, вĕсен йышĕнче ытларахăшĕ ватăсем — тивĕçлĕ канăва тухнисем. Апла пулин те, Светлана Сергеевна каланă тăрăх, хăй почтальонка сумкине çĕклеме пуçланăранпах, “Ял пурнăçĕнчен” ютшăнмаççĕ. Сăмахран, Федора Владимирова, Римма Петрова, Алексей Моисеев, Рева Алексеева, Иван Иванов, Алевтина Васильева тата ыттисем те — район хаçачĕн чăн-чăн уйрăлми тусĕсем.
— 23 çул ĕçлетĕп çак ĕçре. Манăн участокра — пĕтĕмпе 5 ял. Ĕçлĕ кунсенче куллен 400 киле ытла çитме, кĕрсе тухма тивет. Кашни çынпах курса калаçмасассăн та кашнин чун-чĕре туртăмне витĕрех куратăп тепĕр чух. Уйрăмах çакă хаçат-журнал çырăнтарнă тапхăрта палăрать, — хăй шухăшне пытармасть почтальонка. — Çавах та тăрăшни, çине тăни кирлĕ. Пирĕн кашниншĕн тус-юлташ пулмалла.
Халь район хаçачĕ хăйĕн сăн-сăпатне чылай улăштарчĕ. Юлашки вăхăтра содержанийĕпе лайăххи енне сулăнни куç умĕнчех. Вулакансемпе яланах çума-çуммăн, юнашар пулма тăрăшать. Райхаçат вулакансене вăл е ку çивĕч ыйтупа уçă калаçăва чĕнет, вулакан анкетине те ирттерет тата ытти те. Ку сăмахсем Светлана Маркова почтальонка калас сăмахсем пулчĕç.
— Эпĕ пĕлнĕ май редакцинче вăй хуракансем темиçе çул ĕнтĕ ялсене тухса çÿреççĕ, ĕç коллективĕсенче пулаççĕ, туслă, ăшă тĕл пулусем йĕркелеççĕ, — сăмахсене сыпăнтарчĕ почтальонка. — Акă, Малти Карăкра та çак уйăхра райхаçат кунĕ пулать тенине илтнĕччĕ. Тĕрĕс хыпар. Малтикарăксемпе курнăçассине, чăнах та, редакцин кăçалхи ĕç планне те кĕртнĕ.
Апла пулсан çывăх вăхăтрах пĕчĕк яла çитсе курма çине тăрăпăр. Вулакансем хăйсем ăш пиллĕн йышăнма хатĕр пулнине епле-ха хаваспах пурнăçлаймăн. Тĕл пулу, паллах, юрă-ташăпа та савăнтарĕ.