20 мая 2008 г.
Упире библиотекăран çын татăлмасть. Çынсем çакăнта кĕнеке, хаçат-журнал вулама кăна-и, вулав залĕнче вунă çул каялла уçăлнă этнографи кĕтесне те кăмăлласах çÿреççĕ.
— 1998 çулхи март уйăхĕн пуçламăшĕнче пуçласа халăха йышăнчĕ пĕчĕк музей. Манăн тивĕç çак ырă ĕçе вырăнсенче пуçарса ярса, çапла майпа чăваш халăхĕн ĕлĕкхи пуянлăхне, мулне пĕрчĕн-пĕрчĕн пуçтарса, упраса хăварса вĕсен никĕсĕ çинче çитĕнекен ăрăва чăвашсен пурнăçне тĕп-тĕрĕс ăнланма пулăшасси, — тет ЧР культурăн тава тивĕçлĕ ĕçченĕ Елена Михайловна Константинова.
Кунта эсир пир вырăнĕ, яр уççи хутăруççи, сÿре, хĕç, хултăрчă, кĕнчеле, ăса, йĕрĕлчĕ, шăрт, тăпач, ухват тата ытти япаласене те курма пултаратăр. Чăвашсен авалхи çи-пуçĕ те куракансене хăй патнелле чĕнет.
Мĕн кăна çук-ши унăн музей-кĕтесĕнче? Хăйĕн шăпине культура пурнăçĕпе, музей ĕçĕпе çыхăнтарнă хĕрарăма Пĕтĕм тĕнчери музейсен кунĕ ячĕпе ырлăх-сывлăх, ăнăçусем сунар. Елена Михайловна çине тăнипех библиотека çумĕнче “Сурпан” фольклор ансамбльне йĕркеленĕ. Çав йышри Лена Борисова, Роза Германова, Зоя Миронова, Зинаида Федорова, Ирина Николаева тата ыттисем те час-часах сцена çине тухаççĕ, хăйсен пултарулăхĕпе савăнтараççĕ.