20 мая 2008 г.
“Нива” хуçалăх çак кунсенче ĕне пуçне 12,5 килограмм сĕт суса илет. Кĕтĕве уя кăларнăранпа, майăн 8-мĕшренпе, пĕтĕмĕшле сăвăм 500 килограма яхăн ÿснĕ. Игорь Федоровпа Илья Игнатьев, Илья Ильинпа Леонид Федотов, Аглеметдин Хайбуллинпа Владимир Филиппов, Альберт Яковлев кĕтÿçĕсем ĕнесене, сăмах май кунта икĕ кĕтÿ, симĕс курăк çинче ирхи 8 сехет çурăран пуçласа 17 сехетчен çитерсе çÿреççĕ. Кунсăр пуçне паниçкесене рацион тăрăх пусыпка — 4-шар, утă 6—7-шер килограмм тивет, биологилле хушăмсем те параççĕ. Илья Игнатьев кĕтÿçĕ каланă тăрăх, ĕнесене цистернăпа шыв илсе тухса, пысăк ваннăсем çине тултарса параççĕ. Кĕтÿçĕсем хăйсен ĕçне аван пĕлеççĕ, вĕсем инкек-синкексемпе кĕрешме яланах хатĕр.