20 мая 2008 г.
2007 çулта районта туберкулез ернĕ 21 тĕслĕхе пĕрремĕш хут тупса палăртнă. Ку вăл 2006 çулхипе танлаштарсан — 12,5 процент нумайрах. Е пурăнакан 100 пин çын пуçне ку кăтарту 123,44-па (республикăра 69,5) танлашать.
Кăçалхи виçĕ уйăхра районта туберкулезпа аптранă 3 тĕслĕх вырăн тупнă. Асăннă чир — ерекен, хăрушă чир. Унпа кĕрешес ĕçе сиплевпе профилактика учрежденийĕсенче çеç мар, çĕр-шыври кашни гражданина явăçтармалла. Туберкулез чирĕ çакланасси çын еплерех шайра пурăннипе те çыхăннă.
Мĕн-ха туберкулез? Вăраха каякан, ерекен чирсен шутĕнче вăл. Чирлĕ çынран тавралăха микробактерисем сарăлаççĕ: сурчăкпа, шăкпа е сурантан юхакан пÿр урлă та. Туберкулез чирлĕ çыннăн япалисенчен (ал шăлли, вырăн таврашĕ, савăт-сапа тата ытти те) ерет. Ачасем ку тапхăрта пуç, вар-хырăм, кăкăр ыратнипе аптраççĕ. Ĕçкĕ-çикĕпе аптракансем, никотинсемпе туслашнисем, апат-çимĕç çисе тăранайманнисем (уйрăмах белок çитменнисем) туберкулез чирĕпе ытларах аптраççĕ.
Пирĕн çĕр-шывра çуралнă ачасене туберкулез чирĕ ересрен хăтăлас тĕлĕшпе планлă иммунизаци ирттереççĕ. 15 çултан пуçласа аслăраххисем хушшинче, унччен туберкулезпа чирленисене, çулленех флюорографи урлă тĕрĕслеççĕ. Çулталăк тултарнă тата унран аслăрах çамрăксем хушшинче, 17 çула çитменнисене манту тăваççĕ.