20 мая 2008 г.
XXIII Тĕнче кубокĕ Шупашкарта виçĕ куна пычĕ.Майăн 11-мĕшĕнче ăна Управ-анне палăк умĕнче савăнăçлă лару-тăрура хупрĕç: ЧР Президенчĕ Н. Федоров, ИААФ президенчĕ Л. Диак 50 тата 20 километрлă дистанцисенче палăрнă уйрăм спортсменсемпе командăсене медальсемпе тата кубоксемпе чысларĕç. ИААФ ялавне Шупашкарсем Мексикăна пачĕç, мĕншĕн тесен çитес XXIV Тĕнче кубокĕ унта иртет. “Сывă пул, хăнасене кăмăллă йышăннă Чăваш Ен, Сывă-и, Мексика” тесе каларĕç.
Майăн 10-мĕшĕнче XXIII Тĕнче кубокне уçнă чух массăллă старта Кĕçĕн Шетмĕпе Еншик Чуллă тата Трак гимназийĕнчи çамрăк хăвăрт утакансем çирĕмĕн (вĕсен тренерĕ — В. П. Петров), Светлана Григорьева (Карай), Оксана Хайбуллина (Кĕçĕн Шетмĕ), Николай Николаев (Туçи Чуракасси), майăн 10—11-мĕшĕсенче район администрацийĕн физкультурăпа спорт тата çамрăксемпе ĕçлекен сектор заведующийĕ А. Н. Лебедев, В. М. Егоров, В. В. Моисеев (иккĕшĕ те Красноармейски), А. В. Никандров (Енĕшкасси) — судья коллегийĕн йышĕнче, тĕнче класлă спорт мастерĕ Ольга Россеева (Çĕньял Чуракасси), спорт мастерĕсем — Алексей Григорьевпа (Карай) Александр Пименов (Сурăмхĕрри) апат çитермелли тата уçăлтармалли пунктсенче пулăшма хутшăнчĕç.
Çапла, XXIII Тĕнче кубокне çÿллĕ шайра ирттерес çĕре Трак енсем те хăйсен сумлă тÿпине хыврĕç.