20 мая 2008 г.
Республика кунĕ тĕлне районта 8 километр автоçула хытă сийпе витсе ĕçе кĕртмелле. Çавăн пек задача тăни çинчен пĕлтерчĕç майăн 13-мĕшĕнчи район пуçлăхĕ патĕнче иртнĕ канашлура. Унта Трак ен территорийĕнче çул-йĕр тăвакан подрядлă организацисен ертÿçисене чĕннĕ.
Малтанах район администрацийĕн çул-йĕр ыйтăвĕпе ĕçлекен ертсе пыракан специалисчĕ Ю. И. Иванов районти çул-йĕр обăекчĕсенчи лару-тăрупа паллаштарчĕ. Тĕпрен илсен, халĕ подрядчиксем пĕлтĕрхи кăлтăксенчен хăтăлас тĕлĕшпе ĕçлеççĕ. Анчах та Ванюшкасси çулĕ çинче лару-тăру йывăртарах иккен. Кунта ноябрь-декабрьте шăннă çĕр çине хăпартнă дамба, уйрăмах Мăн çырма тĕлĕнче, нумай аннă. Çакă çул сарас ĕçсене самаях чăрмав тăвать. Ку обăектри лару-тăрупа район пуçлăхĕ Станислав Николаев вырăна тухса паллашрĕ. Унпа пĕрле унта район администрацийĕн çул-йĕр енĕпе ĕçлекен ертсе пыракан специалисчĕ Ю. Иванов та пулнă. Юрий Иванович каланă тăрăх, çав кун обăектра ДТ-75 трактор çĕре рекультиваци тунă. Э. Софронов мастер майăн 14-мĕшĕнче автогрейдерпа погрузчик, самосвал тата рабочисем килсе çитмеллине пĕлтернĕ. Асăннă обăектра ĕç калăпăшĕ пысăк, дамбăна хăпартса çитерме тăпра нумай турттармалла. Хывнă пăрăхсене çирĕплетсе шыв юххисем тумалла тата ытти те. ОАО “Агротракт” подрядчике Ванюшкасси çулне июлĕн 1-мĕшĕ тĕлне хытă сийпе витсе ĕçе кĕртме хушса хăварнă. Çакăнпа унăн ертÿçи Глафира Ивановна Григорьева килĕшнĕ.
Умри задача пурне те паллă: ЧР Президенчĕн Указне пурнăçласа, Трак енри ялсене хытă сийлĕ çулсемпе çыхăнтарассине кăçалах вĕçлемелле. Канашлура подрядчиксене çакăн пирки тепĕр хут асилтерчĕç те.