20 мая 2008 г.
Чăнах, чăнах. Телей курма тесех çуралмастпăр та, вăл çумрах çÿренине пĕлсен те хаклама тăрăшмастпăр. Ниме пăхмасăр малаллах ыткăнатпăр.
Акă, çĕнĕ мăшăрсем алла аллăн тытăнса ЗАГСран тухаççĕ. Эрне е уйăх иртет-и — пĕр-пĕрне асăрхама та пăрахатпăр, сасси çеç илтĕнсе тăтăр. Туйăмсем мăкалаççĕ, юлташăмăрсем. Мĕн тăвăн, пурнăç çаплалла пуль. Пурнăç йĕрки тени юрату çиппине татасшăнах ăнтăлать.
Лавккара пĕр арçын, 30—35 çулсенчискер, сутуçăпа калаçать. Арçын пĕр пин тенкĕ вакласшăн. Лешĕ пуçне сулать çеç. Ара, каялла пама кирлĕ-çке ăна вак укçа. “Арăмупа ачусене ыр тума шоколад илсемĕр, укçу вакланĕ те”, — терĕм эпĕ. “Э, э! Пурăнаççĕ шоколадсăрах”, — терĕ те, арçын, тулалла çĕмрен пек вирхĕнчĕ.
Паянхи кун, ăшă çур кунне, чечексем йăл илчĕç. Мĕн тĕрли çук-ши? Тавралăх ешерет кăна. Çывăх çынна ыр тума, хамăр кăмăла çĕклеме (телей çакăнта вĕт) ним те тăвас килмест. Татса тыттарасчĕ пĕр чечекне, хуçса парасчĕ шурă çĕмĕрт çеçкине. Курăн вара тÿрех: куçсем çиçеççĕ, йăл кулă çуралать.
Вăрмана çул хыврăр мăшăрупа, кĕреçе-сенкĕ аври касса якатрăр, — çĕклесе киле çитертĕр. Мăшăрăр епле савăннине, куçран ăшшăн юратуллăн пăхнине курмасăр май çуках.
Юрату туйăмне тытса тăма пулать ĕмĕр иртиччен те. Тăрăшмалла çеç ырă тума. “Ыр кăмăллăх çулĕ” кăна мар, ĕмĕрлĕх ку пулĕ. Телей çăлкуçĕ-çке вăл, ыр туни, ара.