20 мая 2008 г.
Кăçалхи çур кунне Трак енрен Раççей Çарĕн ретне 30 каччă тăмалла. Çу уйăхĕн 13-мĕшĕнче вĕсем валли халăх пултарулăхĕн районти çуртĕнче Призывник кунне йĕркелерĕç. Каччăсем “Прощание славянки” марш кĕввипе зала кĕрсе малти ретсене вырнаçса ларчĕç. Вĕсене район администрацийĕ ячĕпе социаллă аталану секторĕн заведующийĕ В. Н. Лукин ăшшăн саламларĕ, Тăван çĕр-шыв хÿтĕлевçин чыс-сумне çÿлте тытма, юратнă Трак ене таса та çирĕп сывлăхпа таврăнма ырă сунчĕ. Призывниксем хушшинче конкурс та пулчĕ.
Ыран строя тăракан яш каччăсене ял тăрăхĕсен администрацийĕсен представителĕсем те кăмăллă сăмахсем каларĕç, кашниех парнесемпе чысларĕ. Залра призывниксен ашшĕ-амăшĕсем те, тăванĕсемпе çывăх çынсем те пулчĕç. Халăх пултарулăхĕн районти çурчĕн хĕрĕсем “Мы девичий отряд” инсценировкăпа савăнтарнине, Г. Яковлев, Н. Николаева (вăлах Призывник кунне йĕркелесе пычĕ) тата Н. Никоноров юрланă юрăсене вĕсем те алă çупсах йышăнчĕç.
Унтан салтака кайма хатĕрленнĕ каччăсене сцена çине йыхравларĕç. Вĕсен умĕнче Красноармейски тата Çĕрпÿ районĕсен çар комиссариачĕн пай пуçлăхĕ Е. С. Афанасьев майор сăмах каларĕ, унтан савăнăçлă лару-тăрура призывниксене повесткăсем пачĕ.