20 мая 2008 г.
“Единая Россия” парти “Çĕр-шыври ача-пăчан чи лайăх тренерĕ” конкурс ирттересси çинчен пĕлтернĕ.
Ăна ачасемпе çамрăксем хушшинче сывă пурнăç йĕркине çирĕплетес, чи лайăх тренера, физкультура учительне, обществăлла майпа ĕçлекен тренера палăртас тĕлĕшпе ирттереççĕ.
Пысăк спорт ача-пăча спортĕнчен пуçланать. Кунта уйрăмах хакли çакă: “Единая Россия” ирттерекен конкурс пулас олимп чемпионĕсене хатĕрлекен, çĕр-шывăн сывă та тĕреклĕ гражданĕсене çитĕнтерекен тренерсене хавхалантарса, пулăшса пырасси. Тренерсене çак номинацисемпе суйласа илеççĕ: “Чемпион тренерĕ”, “Халăх тренерĕ”, “Шкул тренерĕ”, “Ача-пăчан чи лайăх çамрăк тренерĕ”, “Çĕнтерÿ”.
Конкурса спорт тытăмĕнче тăрăшакан, ачасемпе çул çитменнисемпе ĕçлекен тренерсем, физкультура учителĕсем, кружоксемпе секцисенче, клубсенче спорт енĕпе ĕçлекенсем, физкультурăпа массăллă ĕçсен йĕркелÿçисем, ача-инвалидсем, сывлăх енчен хавшак, амăшĕн хÿтлĕхĕсĕр юлнă, тăлăх пепкесем валли уçнă канупа пĕлÿ паракан учрежденисенчи тренерсем, вĕсем хăйсене ача-пăча спорчĕн чăн-чăн йĕркелÿçисем евĕр кăтартаççĕ пулсан, хутшăнма пултараççĕ.
Заявкăсене “Единая Россия” партин сайтне е Шупашкар хули, Ленинградская, 32 адреспа е 62-10-88 телефонпа памалла.
Çĕнтерÿçĕсене дипломсемпе хаклă парнесемпе, чи лайăх тренерсене кăçалхи кĕр кунне федераллă шайра чыслаççĕ.