20 мая 2008 г.
ЧР Президенчĕ Н. В. Федоров ЧР Патшалăх Канашне янă “Малашлăхшăн паян ĕçлетпĕр!” Çырăвĕнче çынсем, уйрăмах çамрăксем хушшинче, табак туртассипе кĕрешес тĕлĕшпе пурнăçламалли ĕçсем çинче чарăннă.
— Вун-вун пин çамрăк (тата хĕрсем — пулас ача амăшĕсем) табак туртса хăйсен тата таврари çынсен сывлăхне сиен кÿреççĕ, — тет Николай Васильевич.
Çырура палăртнă тăрăх, чĕлĕм-пируспа çывăхланнине пула, çемье бюджетĕнчен кашни кун 13 миллион тенкĕ ытла, уйăхне — 400 миллион тенкĕ, çулталăка вара 5 миллиарда яхăн укçа-тенкĕ тăккаланать. Чăнах та, çавăн чухлĕ пурлăха çилпе вĕçтерни, çитменнине хăйсене кăна мар, туртман çынсене те наркăмăшлантарни тата çемьепе патшалăх бюджечĕсенчен вĕсене сиплеме нумай-нумай укçа-тенкĕ тăкаклани шухăшлаттарать, паллах. Шухăшлама пултаракан кашни çын табакпа ашкăннипе харпăр хăй организмне сиен кÿнине ăнланать ĕнтĕ.
Юлашки вăхăтра акă, çамрăксен йышĕнче пирус-чĕлĕмпе туслашнисем йышланчĕç. Анчахрах район центрĕнчи пасартан виçĕ каччă тухрĕç те çыхăну уйрăмĕ еннелле çул тытрĕç. Виççĕшĕ те тупăшмаллах пирус мăкăрлантараççĕ. Çавсемех “Чăвашпичет” киоскĕ умĕнче татах тепрер пирус чĕртсе ячĕç.
Мĕншĕн-ха йĕркеллĕ çынсемех пирус-чĕлĕм йăсăрлантараççĕ? Мĕншĕн-ха туртатпăр çав йытă çимен апата? Ниепле те ăнланма пултараймастăп.
Эпĕ саккăрмĕш теçетке çинче пыратăп. Анчах та ку тарана çитсе те çăвара пирус-чĕлĕм хыпса курман. Çар хĕсметĕнче виçĕ çул ытла пулнă хыççăн тăван яла таврăнсан та тĕтĕм-сĕрĕме аса илмен. Кирлĕ мар тетĕп ăна яланах.
Шел пулин те, вырăнсенче табак туртакансене хирĕç кĕрешессипе, сăмахран, унăн сиенĕ пирки ăнлантарассипе, çителĕксĕртерех ĕçлетпĕр. Хаçатсенче те пирус-чĕлĕм сиенĕпе çыхăннă материалсем сайра-хутра кăна пичетленеççĕ.
Ман шутпа, ку ĕçе медицина ĕçченĕсене те анлăрах явăçтармалла. Харпăр хăйĕн ырă тĕслĕхĕ вара — чи хакли. Енчен те шкул ачи хăйĕн вĕрентекенĕ табак туртнине асăрхарĕ-тĕк… шухăшласа пăхăр? Енчен те ашшĕ е амăшĕ пирус-чĕлĕм мăкăрлантараççĕ?... Çамрăкăн мĕн тумалла-ха?!..