16 мая 2008 г.
Кашни çур куннех Çĕнĕ Йĕкĕт ялĕнче пурăнакан арçынсем, çÿлтен никам хушмасăр, хăйсен ирĕкĕпе тата вăйĕпе Мăн Çавал урлă йывăçран кĕпер хывнине нумайăшĕ пĕлет ĕнтĕ. Кăçал та вĕсем майăн 1—2-мĕшĕсенчи канмалли кунсенче, анкартинче çурхи çĕр ĕçсем нумаййине пăхмасăр, пĕр шухăшлă пулса, мăн асаттесен мелĕпе — ниме туса кĕпер хыврĕç.
Чăнах та, çулран çул йывăрлăхсем те, тăкакĕсем те куç умĕнчех ÿссе пыраççĕ. Кĕпер хатĕрĕсем йывăçран пулнăран çулсеренех хавшаççĕ. Свай çапакан вăй питти çамрăксем те ялта пурăнманни, аякка ĕçлеме çÿрени те чăрмав кÿрет. Çапах та Çĕнĕ Йĕкĕт ял старостисем В. Николаевпа В. Гаврилов тата В. Иванов пенсионер алă усмаççĕ. Вĕсемех асăннă ĕçсене йĕркелесе тăнипе кĕпер хатĕрĕсене çĕнетсе пыраççĕ. Я. Анисимов хăйĕн Т-40 тракторĕпе кашни çулах пулăшу панине те палăртмалла. Упи ял тăрăхĕн администрацийĕ те ку ĕçсенчен аякра тăмарĕ. Хальлĕхе пăтапа тивĕçтерчĕ пулсан, малашне вара ял тăрăхĕн кăçалхи бюджетĕнче кĕпер çĕнĕрен хывас ĕçе тăсмашкăн укçа-тенкĕ уйăрса хăварнă. В. Григорьев пуçлăх каланă тăрăх, çывăх вăхăтра, Мăн Çавал шывĕ чаксан тата ăшăнсан, çĕнĕйĕкĕтсен кĕпер патĕнче тепĕр хут вăй хума тивет: унччен кÿрсе килнĕ тимĕр-бетон хатĕрĕсене никĕсе вырнаçтармалла. Юлашкинчен калас килет: çак кĕпер çĕнĕйĕкĕтсене анчах кирлĕ мар. Нумайăшĕ кĕпер хывасса кĕтет, апла вĕсен те çак ĕçрен аякра тăрас марччĕ.