16 мая 2008 г.
Çу уйăхĕн 10-мĕшĕнче Трак чăваш-нимĕç гимназийĕнче Чăваш Республикин Вĕрентÿ тата çамрăксен политикин министрĕ Г. П. Чернова пулчĕ.
Галина Петровна малтанах вĕренÿ пÿлĕмĕсене, “Чăваш пÿрчĕ” музея çитсе курчĕ, ЧР тава тивĕçлĕ учителĕпе, гимнази директорĕпе Г. И. Юлмасовапа тĕл пулса калаçрĕ, унтан педагогика коллективĕпе тата вĕренекенсемпе курнăçрĕ. Вăл хăйĕн сăмахĕнче республикăри вĕрентÿ тытăмĕнче пулса иртекен ырă улшăнусем пирки тĕплĕн чарăнса тăчĕ, нимĕç чĕлхине тарăннăн вĕрентекен шкулсем Чăваш Енре нумаях маррине, вĕсем сумлă ĕç тунине палăртрĕ.
И. Ю. Иванова учительница вара гимназине нимĕç чĕлхипе презентацилерĕ.
Тĕл пулăва район пуçлăхĕ С. А. Николаев, унăн социаллă ыйтусемпе ĕçлекен, пĕрремĕш çумĕ, вĕрентÿ пайĕн пуçлăхĕ Н. И. Антонов, И. Н. Ульянов ячĕллĕ Чăваш патшалăх университечĕн нимĕç чĕлхин кафедрин пуçлăхĕ В. А. Иванов профессор хутшăнчĕç, С. А. Николаевпа В. А. Иванов сăмах каларĕç, “юратнă профессине тĕрĕс суйласа илмелле”, — терĕç.
Г. П. Чернова министр çавăн пекех Красноармейскинчи физкультурăпа сиплев центрне çитсе курчĕ.