16 мая 2008 г.
Май уйăхĕн шутлă кунĕсем юлаççĕ. Июнь уйăхĕ те çитет. Вăл çуллахи шыва кĕмелли тапхăр пуçланнипе çыхăннă. Ăна хатĕрленсе кĕтсе илессипе районта епле ĕçлеççĕ-ха? Район администрацийĕн гражданла оборона тата чрезвычайлă лару-тăру енĕпе ĕçлекен секторĕн заведующийĕ Николай Иванович ВАСИЛЬЕВ акă мĕн каласа парать.
Вăхăт сисĕнмест, паллах. Çуллахи вăхăтра шыва кĕмелли шăрăх кунсем те çывхарса килеççĕ. Ку тĕлĕшпе пирĕн служба мĕн тăвать-ха? Чăн малтанах вăл район администрацийĕн пуçлăхĕ Станислав Николаев 2008 çулхи апрелĕн 9-мĕшĕнче çуллахи вăхăтра вырăнсенче шыва кĕнĕ чух асăрханулăха ÿстерессипе 251-мĕш номерлĕ йышăну кăларнипе паллă. Ку тĕлĕшпе мероприятисен планне çирĕплетнĕ, ăна ял тăрăхĕсен пуçлăхĕсен канашлăвĕнче пăхса тухнă. Тĕрĕссипе, кашни ял тăрăхĕн территорийĕнче шыва кĕмелли вырăнсем, акă, Алманч ял тăрăхĕнче вĕсем виçĕ çĕрте, пулмалла. Çав вырăнсене тĕп-тĕрĕс палăртса хумалла, вĕсенче шыв таса та тăрă пулмалла, шыв тĕпĕнчи мĕн пур ăпăр-тапăра тасатмалла.
Ялсенчи шыва кĕмелли вырăнсен тасалăхĕпе тирпейлĕхне Шупашкарти пĕчĕк калăпăшлă суднăсен патшалăх инспекцийĕ (ГИМС) тĕрĕслет. Эпир хамăр пата водолазсене илсе килмешкĕн заявка тăратнă ĕнтĕ. Вĕсем ирĕк параççĕ.
Шыва кĕмелли тапхăрпа çыхăннă, июнĕн 16-мĕшĕнчен тытăнса июлĕн 16-мĕшĕччен пыракан, шыва кĕрекенсен хăрушсăрлăхĕн правилисене пăхăнассишĕн иртекен уйăхлăх та шыва кĕнĕ чух асăрханулăх правилисене çирĕпрех пăхăнмаллине тепĕр хут аса илтерет.