16 мая 2008 г.
Эпир çак кунсенче Тăван çĕр-шывăн Аслă вăрçинче Çĕнтерÿ тунăранпа 63 çул çитнине паллă турăмăр. Аслă Çĕнтерÿшĕн пурнăçне панă миллионшар ывăл-хĕрĕн тĕлĕнмелле паттăрлăхĕ халăх асĕнчен тухмасть. Паттăрлăх аслă та вилĕмсĕр, Тăван çĕр-шыва хÿтĕлесе пуçне хунисене асăнса районти библиотекăсенче тĕрлĕрен мероприятисем иртрĕç. Акă майăн 4-мĕшĕнче тĕп библиотекăра “Прочти книгу о войне” литература акцине уçрăмăр. Библиотекăна çÿрекен кашни вулакана çав кунсенче библиотекарьсем пĕрер кĕнеке вулама сĕнчĕç, вĕсене пулăшма ятарлă кĕнеке выставки йĕркелерĕмĕр. Вулакансем, библиотека ĕçченĕсем йĕркелесе пыракан “Паттăрлăх” ятлă статьясен альбомĕпе (унта хамăр районти вăрçă ветеранĕсемпе вăрçăра пуçне хунă паттăрсем çинчен материалсем пуçтарнă), М. Прохоровăн “Вут-хĕмре иртнĕ çамрăклăх” тата Л. Николаевăн “Эпир вăрçă ачисем” аса илÿсен пуххисемпе паллашма пулать. Выставкăна 63 материал вырнаçтарнă. Вулав залĕнче “И кисть с врагом сражалась” картинăсен выставки те ĕçлерĕ. Вулав залĕнче вăрçă çинчен калакан видеофильмсем кăтартассине йĕркелерĕмĕр. Çавăн пекех районти библиотекăсенче вăрçă ветеранĕсемпе çамрăксен тĕл пулăвĕсене, аса илÿ тата литература каçĕсене, истори урокĕсене йĕркелерĕç, библиотекарьсем палăксене йĕркене кĕртнĕ çĕре те хутшăнчĕç.