13 мая 2008 г.
Ĕçкĕ-çикĕ ырă тумасть. Сиенлĕ çак пулăмпа тĕрлĕ шайра кĕрешÿ пуçаратпăр пулсан та, эрех-сăрапа айкашса пурăнакансен йышĕ чакни сисĕнмест. Хамăр районта та, ав, ку енĕпе çулленех район пуçлăхĕн йышăнăвĕпе уйăхлăх йĕркелетпĕр-ха. Кăçал вăл апрелĕн 21-мĕшĕнче пуçăнчĕ.
Çур уйăх иртрĕ ĕнтĕ унтанпа. Улшăнусем пур-и? Е ĕçкĕçсем малтанхиллех иртĕхеççĕ?
Çак ыйтăва пăхса тухрĕç те ĕнтĕ майăн 5 мĕшĕнчи ирхине район пуçлăхĕ çумĕнчи канашлура. Алманч ял тăрăхĕн пуçлăхĕ Л. Федорова, Мăн Шетмĕ ял тăрăхĕн ертсе пыракан специалисчĕ П. Николаева, ял хуçалăх пайĕн пуçлăхĕ Ю. Петров тата районти шалти ĕçсен пайĕн пуçлăхĕ В. Рожков отчетсем турĕç. Уйрăм ĕçсем пур-ха ĕнтĕ. Вĕсене хирĕçлеймĕн. Çапах “лачакана” тарăнраххăн путса пыратпăр вĕт. Ĕçкĕçсем унчченхиллех иртĕхеççĕ. Мухмăр-сухмăрпа аптăракансене кÿршĕ-аршăна кÿрентересси шăл витĕр чăрт! сурассипе пĕрех. Алманч енре çеç 60 çынна яхăн “уртаракан ĕне сĕчĕпе” киленекенсем. 2— 3-ĕн пухăнса спирт-аншарли “лĕрккекенсем” те пур вĕсен хушшинче. Ĕçме пăрахнисем ку хушăрах пиллĕкĕн çеç. Тата 5 çынпа калаçнă, терĕ пуçлăх. Икĕ çемьене шута илнине палăртрĕ. Каçхине çамрăксем пухăнакан вырăнсенче рейдсем ирттересси вара манăçа тухнă.
Мăн Шетмĕре профилактика тата общественноç канашĕсен пĕрлехи ларăвĕнче çĕкленĕ-ха ĕçкĕ-çикĕне хирĕç кĕрешес ыйтăва. Майăн 1—2-мĕшĕсенче милицин участокри уполномоченнăйĕпе А. Каршовпа пĕрле ĕç вырăнĕсене çитнĕ, йывăр шутланакан 4 çемьере пулнă, 5 çын пирки протокол çырса 200-шер тенкĕлĕх штрафланă. Халăх ытларах пухăнакан çĕрте вара нимĕнле мероприяти те пулман. Çапла, çĕнĕлĕх курăнмасть-ха.
Ака уйăхĕн 30-мĕшĕнче ял хуçалăх пайĕн специалисчĕсем “Досаево” ял хуçалăх артелĕн пĕр механизаторне хĕрĕнкĕ пулнăран ĕçрен хăтарнă. Ытти çĕрти ку евĕр тĕслĕхсем, тен, çур акире сисĕнмесĕрех юлнă.
Шалти ĕçсен пайĕн пуçлăхĕ пĕлтернĕ тăрăх, ака уйăхĕн 28 — çу уйăхĕн 4-мĕшĕсенче Красноармейски ялĕнче кăна çул-йĕр правилисене пăснăшăн 48 çынна административлă явап тыттарнă. Калăпăр, пĕрремĕш кунне хăвăртлăха ÿстернĕ-шĕн — 4, çул паллине пăхăнманшăн — 2, çутă приборĕсемпе тĕрĕс усă курманшăн — 3, хăрушсăрлăх пиçиххийĕпе çыхăнманшăн — 2, ÿсĕрпе руль умне ларнăшăн 1 водителе, çул çÿремелли правилăсене пăснăшăн çуран çÿрекен 1 çынна айăпланă. Вĕсен йышĕ ытти кунсенче те чакман.
Канашлуран (ăна район пуçлăхĕ С. Николаев йĕркелесе пычĕ) çапла пĕтĕмлетÿ тума пулать: уйăхлăх пырать, уйрăм ĕçсем пур, анчах вĕсен витĕмлĕхĕ çав-çавах уçăмлăн курăнмасть-ха.