13 мая 2008 г.
Шупашкарта XXIII Тĕнче кубокĕ иртрĕ. Унта çĕр чăмăрĕ çинчи 55 çĕр-шыври 450 ытла спортсмен вăй виçрĕ. Тупăшусем 5 ушкăнра пычĕç. Пуринче те — каччăсен — 10 километрлă, хĕрсен — 10, арçынсен — 20, хĕрарăмсен — 20 тата арçынсен 50 километрлă дистанцийĕсенче Раççей пĕрлештернĕ команди çĕнтернипе вĕçленчĕ, пĕр сăмахпа каласан, пур ушкăнĕ те Тĕнче кубокне çĕнсе илчĕ. Каччăсен 10 километрлă дистанцийĕнче Алексей Борцайкин, арçынсен 50 км дистанцийĕнче Денис Нижегородов (иккĕшĕ те Раççей) тĕнчен çĕнĕ рекорчĕсене лартрĕç. Хĕрсен ăмăртăвĕнче — Татьяна Калмыкова (Раççей, 10 км), арçынсенчен — Франсиско Фернандес (Испани, 20 км), хĕрарăмсенчен Ольга Каниськина, 20 км, çĕнтерÿçĕ пулса тăчĕç.
XXIII Тĕнче кубокне майăн 9-мĕшĕнче, Аслă Çĕнтерÿ кунĕнче, Шупашкарти “Олимпийский” стадионта савăнăçлă лару-тăрура уçрĕç. Унта Пĕтĕм тĕнчери çăмăл атлетика федерацийĕсен ассоциацийĕн президенчĕ Ламин Диак (Сенегал), ИААФăн аслă вице-президенчĕ Сергей Бубка, Раççейри çăмăл атлетика федерацийĕн президенчĕ, ИААФ совечĕн членĕ Валентин Балахничев, Раççей Патшалăх Думин хăш-пĕр комитечĕсен председателĕсемпе депутачĕсем, хăвăрт утас енĕпе Олимп вăййисен, тĕнче, Европа чемпионĕсемпе призерĕсем тата ыттисем хутшăнчĕç. XXIII Тĕнче кубокне Чăваш Республикин Президенчĕ Н. Федоров, сăмах каласа, уçрĕ, Раççейри çăмăл атлетика федерацийĕн президенчĕ В. Балахничев, Пĕтĕм тĕнчери çăмăл атлетика федерацийĕсен ассоциацийĕн президенчĕ Л. Диак сăмах каларĕç. XXIII Тĕнче кубокне уçнă чух ИААФ ялавне çĕклесе тухнă çĕре Чăваш Енри паллă хăвăрт утакансемпе пĕрле пирĕн районти Алексей Григорьев (Карай) хутшăнчĕ. Хăвăрт утакансен ячĕпе творчество ушкăнĕсем пысăк концерт пачĕç, спортăн тĕрлĕ енĕпе вăй виçекенсем шоу кăтартрĕç. Стадионта чăн-чăн пысăк уяв пулчĕ, юлашкинчен фейерверк ячĕç. Асăннă спорт мероприятине ирттерме республика чăннипех питĕ лайăх хатĕрленнĕ. Çакă майăн 10—11-мĕшĕсенче те яр уççăн курăнчĕ. Ют çĕр-шывсен представителĕсем Чăваш Ен çыннисем хăнасене тулли кăмăлпа йышăннине, ăмăртусем пынă вăхăтра Раççей спортсменĕсене кăна мар, тĕрлĕ çĕр-шывсен хăвăрт утаканĕсене тăвăллăн хавхалантарса тăнине палăртрĕç.
Тупăшусем вара çав тери çивĕч иртрĕç. Вĕсенче Трак енрен тухнă спортсменсем те хастар кĕрешрĕç. Тĕслĕхрен, каччăсен 10 километрлă дистанцийĕнче Кĕçĕн Шетмĕре çуралса ÿснĕ Эдикт Хайбуллин хĕрÿллĕн кĕрешрĕ. Икĕ километрлă трассăра вăл 4 çаврăм малти ушкăнра пычĕ. Мала тухас ăнтăлу унăн вĕресе тăчĕ. Çакă утмалли техникăна пăсасси патне илсе пычĕ те... Питĕ шел, судьясем ăна юлашки çаврăмра ăмăртуран тухма ыйтрĕç. Эдикт — çамрăк спортсмен, унăн малашлăхĕ пысăк. Çавăнпа та хальхинче çапла çунса кайнишĕн хуçăлма кирлĕ мар, пулас ăмăртусене тата лайăхрах хатĕрленме Эдикт Хайбуллина ырлăх-сывлăх сунар.
Трак енĕн тепĕр хастар спортсменĕ — Людмила Архипова (Дубовка) хĕрарăмсен 20 километрлă дистанцийĕнче вăй виçрĕ. Калас пулать, япăх мар. Кунта вăл 4-мĕш вăхăт кăтартрĕ.