13 мая 2008 г.
Район администрацийĕпе “Ял пурнăçĕ” хаçат парнисене çĕнсе илессишĕн пынă çăмăл атлетсен эстафетăлла ăмăртăвĕнче 37 командăри 250 яхăн спортсмен вăй виçрĕ. Асăннă спорт мероприятине пуçласа тулли мар яваплă “Пятилетка” предприятипе (ертÿçи В. А. Афанасьев) “Шатьма” пĕрлешÿ (Г. Г. Васильев), “Сельэнерго” (Р. В. Илларионов), Л. Н. Данилов (Красноармейски), Н. В. Васильев (Ямайкасси) уйрăм предпринимательсем, Ф. М. Григорьев (казначейство) ЧР Президенчĕ пĕлтернĕ “Ырă ĕçсен çулталăкне” хутшăнса спонсорла пулăшу кÿчĕç. Ăмăрту пуçланас умĕн спортсменсене “Ял пурнăçĕ” хаçатăн тĕп редакторĕ И. А. Прокопьев, районти çăмăл атлетсен федерацийĕн председателĕ В. М. Егоров ăшшăн саламларĕç, ăнăçу сунчĕç. Чăваш Республикин патшалăх ялавне çĕкленĕ хыççăн ăмăрту пуçланчĕ.
Çăмăл атлетика енĕпе “Ял пурнăçĕ” хаçат призĕсене çĕнсе илессишĕн пыракан эстафетăна 1969 çулта ирттерме пуçланă. Ăна пуçараканĕсем ун чухнехи райĕçтăвкомăн физкультурăпа спорт комитечĕн председателĕ Валерий Ильич Гордеевпа “Урожай” ирĕклĕ спорт обществăн районти совечĕн председателĕ В. Антонов пулнă. Кăçалхи эстафетăна ирттерме те хутшăнчĕç вĕсем. В. Антонов çемьесене старт пачĕ.
Çемьесен ăмăртăвĕнче — Ананьевсем
Йăлана кĕнĕ пекех, кăçал та асăннă эстафета çемьесен командисен тупăшăвĕпе уçăлчĕ. Унта кăçал Красноармейски ял тăрăхĕнчи Ананьевсемпе Терентьевсен, Осиповсемпе (Упи) Прохоровсен (Чатукасси) тата Пантелеймоновсен (Кĕçĕн Шетмĕ) çемйисем вăй виçрĕç. Çивĕч кĕрешÿре Ананьевсем (Александрпа Ирина тата вĕсен ывăлĕ Дмитрий) çĕнтерчĕç. Вĕсем 400х300х100 метрлă эстафетăра 2 минут та 21,49 çеккунт вăхăт кăтартрĕç. Иккĕмĕшпе виççĕмĕш вырăнсенче — Осиповсемпе Прохоровсем.
Пикшик ветеранĕсем çĕнтерчĕç
Ку ушкăнра та старта 5 команда тухрĕ. Вĕсенчен Пикшик ял тăрăхĕн спорт ветеранĕсем чи çивĕччисем пулчĕç. Эстафетăн малтанхи метрĕсенчен пуçласа мĕн вĕçне çитичченех ушкăна ертсе пычĕç. Пĕрремĕш этапра команда лидерĕ — Пикшик ял тăрăхĕн пуçлăхĕ Алексей Данилов ыттисем валли лайăх запас туса пачĕ. Вăл, 400 метра 1 минут та 0,5 çеккунтра чупса тухса, чи лайăх вăхăт кăтартрĕ, ятарлă приза тивĕçрĕ. Пикшиксен чысне Алексей Николаевичсăр пуçне Геннадий Тихоновпа Альбина Михайлова, Александр Петровпа Вера Иванова ăнăçлă хÿтĕлерĕç. Вĕсем 5х400 метрлă эстафетăна 6 минут та 24,48 çеккунтра вĕçлеме пултарчĕç.
Иккĕмĕшпе виççĕмĕш вырăнсенче — сывлăх сыхлавĕн “Красноармейски тĕп больници” муниципаллă учрежденийĕпе выльăх-чĕрлĕх чирĕсемпе кĕрешекен районти станци командисем. Ветстанцине В. Ф. Николаев ертсе пыма пуçланăранпа ку коллектив тăтăшах районти спорт ăмăртăвĕсенче хутшăнма тăрăшать тата вĕсенче япăх мар тупăшать.
Икĕ утăм малалла турĕç
Кĕçĕн ушкăнра 12 команда ăмăртрĕ. Вĕсене асăннă эстафетăн тĕп спонсорĕ — тулли мар яваплă “Пятилетка” предприяти ертÿçи Виталий Алексеевич Афанасьев (сăмах май вăл хăй вăхăтĕнче районти вăйлă çăмăл атлетсенчен пĕри пулнă. Германире салтак службине ирттернĕ çулсенче ку çĕр-шывра тăнă совет çарĕсен спартакиадинче виçĕ енлĕ кĕрешÿре (3000 метра чупса, автоматран персе тата граната ывăтса) çĕнтерсе спорт мастерĕн кандидачĕн нормативне тултарнă) старт пачĕ. Малтанхи метрсенченех пикшиксемпе карайсем ку ăмăртăва лайăх хатĕрленни курăнчĕ. Пĕрремĕш этапра Пикшик вăтам шкулĕнчи Анна Яковлева, 400 метра 1 минут та 09,02 çеккунтра вĕçлерĕ, чи лайăх вăхăт кăтартса, ятарлă приза тивĕçрĕ. Асăннă шкулсем хушшинче кĕрешÿ çав тери çивĕч пычĕ. Анчах та пикшиксем хастартарах пулчĕç, эстафета патакне карайсенчен 5 çеккунт маларах финиша илсе çитерчĕç. 6х400 метрлă эстафетăна Пикшик шкулĕн кĕçĕн ачасен команди 6 минут та 48,07 çеккунтра вĕçлерĕ. Пикшик шкулĕн чысне Анна Яковлевапа Данил Данилов, Надежда Ивановапа Эдик Краснов, Ольга Анисимовапа Федор Иванов хÿтĕлерĕç, иртнĕ çулхипе танлаштарсан, икĕ утăм малалла турĕç. Карайсемпе Трак гимназийĕ — иккĕмĕшпе виççĕмĕш вырăнсенче.
Спорт косплексĕн команди вăйлăрах
Предприятисемпе организацисен, учрежденисен командисен эстафетине ку хутĕнче 4 команда хутшăнчĕ. Вĕсен тупăшăвĕнче Заволжски ЛПУМГăн спорт комплексĕн çăмăл атлечĕсем, 5х400 метрлă эстафетăра 5 минут та 32,82 çеккунт вăхăт кăтартса, çăмăллăнах çĕнтерчĕç. Кăна ăнланмалла. Ку йышра спортăн тĕрлĕ енĕпе спорт мастерĕн кандидачĕсем те пур. Хальхинче команда чысне Владимир Михайлов (вăл пĕрремĕш этапра 58,05 çеккунт вăхăт кăтартса, ятарлă призпа грамотăна тивĕçрĕ), Екатерина Баранова, Юрий Ефремов, Наталия Селянкина, Петр Григорьев хÿтĕлерĕç.
Райпопа районти шалти ĕçсен пайĕн командисем — иккĕмĕшпе виççĕмĕш вырăнсенче.
Пикшик ял тăрăхĕ каллех пĕрремĕш
Ку тăрăх пултаруллă спортсменсенчен пуян. Çавăнпа Пикшик енĕн спортсменĕсем тĕрлĕ ăмăртусенче палăраççĕ. Район администрацийĕпе “Ял пурнăçĕн” эстафетинче те каллех вĕсемех çĕнтерчĕç. 5х400 метрлă эстафетăна пикшиксем хальхинче 5 минут та 58,48 çеккунтра чупса тухма пултарчĕç. Ял тăрăхĕн чысне Родион Скворцовпа Светлана Данилова, Алексей Даниловпа Людмила Васильева тата Сергей Лисаев ăнăçлă хÿтĕлерĕç.
Уписемпе кĕçĕншетмĕсем иккĕмĕшпе виççĕмĕш вырăнсене йышăнчĕç.
Гимназистсем кубока каялла тавăрчĕç
Аслă ушкăнри шкул ачисен эстафети яланах питĕ кăсăклантарнă. Хальхинче те çаплах пулчĕ. Уйрăмах мăншетмĕсемпе гимназистсем хушшинче çивĕч кĕрешÿ пыратчĕ. Ку хутĕнче унта пикшиксем хастар хутшăнчĕç. Пĕрремĕш этапра Николай Скворцов гимназистсене мала кăларчĕ. Сăмах май, вăл, 400 метра 55,6 çеккунтра вĕçлесе, ятарлă грамотăпа приза тивĕçрĕ. Иккĕмĕшпе виççĕмĕш этапсенче ушкăн пуçне пикшиксем тухрĕç. Анчах та черетлĕ этапа каяс чух вĕсен çăмăл атлечĕ эстафета патакне йышăннă чух йăнăшрĕ (ăна зонăран кăшт тухарах алла илчĕ, çавна пула пикшиксене малалла ăмăртма чарчĕç) те гимназистсем лидер пулса тăчĕç. Тек вĕсем никама та хăйсенчен иртме ирĕк памарĕç, 10х400 метрлă эстафетăна Н. Скворцов, О. Захарова, Н. Львов, А. Григорьева, Е. Николаев, А. Егорова, Э. Трофимовпа Е. Жестянова, С. Соловьевпа А. Миронова 10 минут та 59,39 çеккунтра вĕçлеме пултарчĕç, куçса çÿрекен кубока каллех каялла тавăрчĕç.
Пĕлтĕрхи çĕнтерÿçĕсем — мăншетмĕсем хальхинче — иккĕмĕш, кĕçĕншетмĕсем — виççĕмĕш вырăнсенче.
Юлашкинчен çĕнтерÿçĕсемпе призерсене дипломсемпе, хаклă парнесемпе чысларĕç, команда-çĕнтерÿçĕсене кунсăр пуçне куçса çÿрекен кубоксем пачĕç. Чыслава “Ял пурнăçĕ” хаçатăн тĕп редакторĕ И. А. Прокопьев, район администрацийĕн физкультурăпа спорт тата çамрăксемпе ĕçлекен сектор заведующийĕ, ăмăртун тĕп судйи А. Н. Лебедев тата асăннă ăмăртун тĕп спонсорĕ, “Пятилетка” предприяти ертÿçи В. А. Афанасьев хутшăнчĕç. Çĕнтерÿçĕ-çемьене — Ананьевсене — ку эстафетăра çулленех мала тухнă çемье пуçĕ, Пикшик ял тăрăхĕн пуçлăхĕ, Çеçмерти А. Н. Данилов хăйĕн куçса çÿрекен кубокĕпе наградăларĕ.
РЕДАКЦИРЕН: “Ял пурнăçĕ” хаçат редакцийĕ асăннă эстафетăра палăрнисене чыслама спонсор пулăшăвĕ кÿнĕ В. А. Афанасьева (“Пятилетка”), Г. Г. Васильева (“Шатьма”), Р. В. Илларионова (“Сельэнерго”), Л. Н. Данилова (“Хозтовары” магазин), Н. В. Васильев предпринимателе, И. И. Никитина (Росгосстрахăн Красноармейски ялĕнчи страховани уйрăмĕ), Ф. М. Григорьева (казанчейство) чĕререн тав тăвать, ĕçре ăнăçу, пурнăçра телей, кил ăшши сунать.
Кунпа пĕрлех асăннă ăмăртăва йĕркелесе ирттерме хутшăннă мĕн пур çынсене: ăмăртун тĕп судйине А. Н. Лебедева, тĕп секретарьне Н. С. Антонова, судья коллегийĕн членĕсене — Р. И. Мефодьева, В. И. Перепелкина, М. С. Семенована, В. М. Егоров секундометриста, милиципе медицина ĕçченĕсене тав туса ырлăх-сывлăх сунать.