13 мая 2008 г.
Аслă Отечественнăй вăрçă совет халăхĕ çĕнтернипе вĕçленчĕ. Çав тапхăрта эпĕ 11 çулта çеç пулнă. Пирĕн атте, вăрçăн чылай паттăрĕ евĕр, киле таврăнаймарĕ. Анне, ялти ытти хĕрарăмсем пекех, Çĕнтерĕве çывхартас тесе чылай ĕçлерĕ. Вăрçă хыççăнхи çулсенче юхăннă хуçалăхсене ура çине тăратас тесе сахал мар тар тăкма тивнĕ. Ачасене те çурлапа тырă вырма, утă-улăм пуçтарма, ытти ĕçсене тума хăнăхтарнă. Арçын ачасем лаша кÿлсе суха тунă, кĕлте турттарнă. Пĕртте çăмăл пулман.
Вăл тапхăр халĕ те асра. Пĕр çултах ĕнесĕр, хĕл каçнă вăкăрсăр тăрса юлтăмăр. Вăрçă хыççăнхи çăмăл мар çулсенче 5 ачана ĕнесĕр пăхса усрасси пĕртте çăмăл мар-çке. “Ĕне —çур пурнăç” тесе ахальтен каламан. Çăкăрĕ çитмен, çĕр улмийĕ те шултра. Апат-çимĕç çителĕксĕртен вăй-хал тĕлĕшĕнчен вуçех начарланса кайрăм. Сурăхсем усраттăмăр. Пĕри пăранланă хыççăн путекки пурăнаймарĕ. Сурăхăн çилли карăнса кайнипе сĕтне сума шутларăмăр. Сĕтне тутанса пăхрăмăр, вăл ĕне сĕтĕнчен те тутлă иккен, çăра тата пылакрах. Çавна май вăй кĕрсе кайрĕ. Кашни кунах пĕрер стакан сурăх сĕтне ĕçеттĕм. Çавна пулах выçăпа вăйсăрланса вилесрен сыхланса юлтăмăр. Каярах пăру ÿстерсе ĕне турăмăр, çителĕклĕ пурнăçпа пурăнма пуçларăмăр. Çапла аса килеççĕ мана Аслă Отечественнăй вăрçă хыççăнхи çулсем.