13 мая 2008 г.
Карайри ватăсен çуртĕнче социаллă ĕçченсем виççĕн: Л. Сергеева, Р. Федотова тата А. Петрова. “Социаллă чи лайăх ĕçчен” районти конкурса хутшăннă май, вĕсем те килти ĕçе пурнăçларĕç, “Манăн професси” темăпа сочинени çырчĕç. Паян вĕсенчи хăш-пĕр йĕркесемпе вулакансене паллашма сĕнетпĕр.
“...Ку ĕçре нумаях мар пулсан та, пĕтĕм кăмăлтан тăрăшатăп. Ватăсемпе калаçса вĕсен чунне уçасси — пирĕн пысăк тивĕç. Кашни çынăн хăйĕн шăпипе ăраскалĕ. Акă, С. Ильинанах илер-ха. Пурнăçĕ çăмăл килмен унăн. Ачаллах колхоз ĕçне кÿлĕннĕскер, кайран та ял çыннисемпе пĕрлех пулать. Анчах инкек куçа курăнса килмест теççĕ. Сима та йывăр чире пула сусăрланса юлать. “Такăнса ÿкес марччĕ, ÿксен те хăвăрттăн тăрса малалла утăмласчĕ” текен тĕллевпе пурăнать. Ал ăстин мĕнле кăна тĕрĕ çук пуль? Тĕрлĕ выставкăсенче те пĕр хут çеç мар кăтартнă вĕсене. “Малашлăха талпăнасчĕ, Турă панă ĕмĕре чыслă ĕçпе, таса кăмăлпа, пуян ăс-хакăлпа ирттересчĕ”, — тет С. Ильина. Ун пек çынсем çĕр çинче ытларах пулинччĕ,..” çырать хăйĕн ĕçĕнче Л. Сергеева.
Ку йĕркесем вара А. Петрова çырнă сочиненирен: “...Эпĕ социаллă ĕçченре вăй хума тытăннăранпа 6 çул çитрĕ. “Ватăна хисепле — ху та ватăлатăн”, теççĕ халăхра. Вĕсем хăйсемпе йăваш пулнăран савăнаççĕ. Кашнинпех уйрăмшарăн, пÿлĕме кĕрсе ларса калаçсан тем пекех хĕпĕртеççĕ...”
“Ватă çын тăватă çын” тесе ахальтен каламаççĕ. Çамрăк чухне никам та ватăласси çинчен шухăшламасть пуль”, — пĕлтерет хăйĕн сочиненийĕнче ватăсен çуртĕнче 12 çул вăй хуракан Р. Федотова. Вăл Карайри ватăсен çуртĕнче 5-мĕш çул пурăнакан, Çĕньял Шетмĕре 1917 çулта çуралнă Юлия Федотовна Федотован çăмăл килмен шăпине сăнлать, “арçынсемпе тан вăрман каснă, суха тунă, тырă акнă”, — тет. Юратнă каччи вăрçăра пуç хунăран çемье çавăрайман вăл.
“...Ытла та таса чунлă, ăшă кăмăллă, тирпейлĕ Юлькка аппа. Кашни апат çитермессерен, мунча кĕртмессерен тав сăмахĕ калать пире. Ватăсен çуртĕнче лайăх пулин те, çапах кашни кунах тăван килне аса илет. Кунта çулĕсемпе чи асли Юлькка аппа, кăçалхи ака уйăхĕнче 92 çула кайрĕ. Тата нумай çул пурăнтăр вăл,..” — хыпарлать социаллă ĕçчен.
Çапла, ватăсене пăхни социаллă ĕçченшĕн — кулленхи ĕç. Ăна чыслăн пурнăçланăранах ветерансем вĕсене ăшă кăмăлпа, хавас чун-чĕрепе, çутă куçсемпе кĕтсе илеççĕ.