13 мая 2008 г.
Пысăках мар Йÿçкасси ялĕ те симĕс тумпа витĕнсе пырать. Кунти Колодецная урамăн 17-мĕш çуртĕнче пурăнакан Зинаида Федоровнапа Евгений Федорович Федоровсем çак илемпе киленме питех те кăмăллаççĕ. Тен, 50 çул каяллахи ака уйăхĕ хăйсене пĕр çемьене пĕрлештернĕрен...
...Пĕрремĕш Çĕньял хĕрĕпе Йÿçкасси каччи пĕрле пурăнма тытăннăранпа Мăн Çавал хăйĕн шывне Атăла сахал мар хăваланă. Анчах савнă ик чĕрешĕн çав вăхăтсем, ун хыççăнхи малаллахи çулсем пĕртте манăçмаççĕ. Шăкăл-шăкăл калаçса пурăнаççĕ, ял-йышра та хисепре. “Çур ĕмĕр хушшинче мăшăр ман çине пĕр хут та алă çĕклемен. Кил-çуртри ĕçсене те пĕрлех тунă”, — пĕлтерет Зинаида Федоровна. Малтанах вăл бригадăри тĕрлĕ ĕçсене хутшăннă. Унтан 16 çул хушши Крентейкассинчи сĕт-çу ферминче ĕнесем сунă. Кирек епле çанталăкра та ир-ирех унта васканă. Ăмăрту çĕнтерÿçисенчен пĕри пулнă, тĕрлĕ паллăсемпе медале тивĕçнĕ. Район Совечĕн депутачĕ те, халăх заседателĕ те пулнă. Пенсине ярса пусас умĕн 4 çул ял халăхĕнчен сĕт пухнă.
Евгений Федорович та пĕртте ĕçсĕр ларман. Бригадир, учетчик, кладовщик, заправщик, страхлакан агент пулнă, “Ĕç ветеранĕ” медале тивĕçнĕ. Нарăс уйăхĕн 29-мĕшĕнче çуралнăскер чăн-чăн менельникне 4 çулта пĕрре çеç кĕтсе илет.
1974 çулта хăпартса лартнă капмар çуртра кĕçĕн ывăлĕн — Сашăн — çемйипе пĕрле пурăнаççĕ халĕ Федоровсем. Кинĕ — Роза, 10 тата 8 классене çÿрекен мăнукĕсем — Костьăпа Настя та çакăншăн тарават. 5 ача çитĕнтернĕ Федоровсем, вĕсене çын тума, ура çине тăма пулăшнă. Аслă хĕрĕ — Юлия, ав, Красноармейски ял тăрăхĕн администрацийĕнче ĕçлет. Тепĕр хĕрĕ — Людмила — Шупашкарта, çыхăну операторĕ. Лариса Кĕçĕн Шетмĕри вăтам шкулта çамрăк ăрăва вĕрентет. Ольга — Чĕмпĕр хулинче, лицензи паракан федераллă центрăн тĕп бухгалтерĕ. Ывăлĕ — Саша — Красноармейскинчи тулли мар яваплă “Чесла — АСТ” пĕрлешÿре тимлет. Вĕсемпе, 7 мăнукĕпе тивĕçлипех савăнаççĕ Зинаида Федоровнапа Евгений Федорович, “пурте пĕрле пухăнсан, пÿрт-çурт илемĕ килет”, — теççĕ.
Пÿртĕнче вара таса та çутă. Тĕрлĕ тĕспе кăтартакан телевизор пуррипе халĕ ыттисене тĕлĕнтереймĕн ĕнтĕ. Çурта пысăклатса çут çанталăк газĕ, анкартинче çăл чавса пÿрте шыв кĕртнĕ, хуларинчен пĕртте кая мар ванна пÿлĕмĕ, кухня майлаштарнă. Ăçта пăхнă унта хаклă йышши сĕтел-пукан. Сад пур. Сăвакан икĕ ĕне, вăкăр, вунă сурăхпа чăх-чĕп усраççĕ.
Çемье чăмăртанăранпа 50 çул çитнĕ май, ака уйăхĕн 30-мĕшĕнче Федоровсен килне хăна-вĕрле пухăнчĕ. Зинаида Федоровнапа Евгений Федоровича пурнăçри паллă пулăм ячĕпе районти ЗАГС пайĕн начальникĕ Е. Л. Павлова ăшшăн саламларĕ. Ылтăн туй хуçисем чĕресен пĕрлĕхне тепĕр хут алă пусса çирĕплетрĕç, çĕрĕсемпе ылмашăнчĕç, ыттисем “йÿçĕ, йÿçĕ” тенипе чуп туса та илчĕç. Елена Леонтьевна вĕсене район пуçлăхĕн С. А. Николаевăн Тав çырăвне тата парне пачĕ. Федоровсене ылтăн туй ячĕпе çавăн пекех Красноармейски ял тăрăхĕн пуçлăхĕн çумĕ В. А. Трофимов, Йÿçкасси, Крентейкасси тата Хусакасси ялĕсенчи ветерансен канашĕн ертÿçи В. И. Иванова, ачисем ыр сунчĕç. Васса Ивановна хăй Федоровсен ылтăн туйне халалласа çырнă сăввине вуласа пачĕ, Зинаида Федоровна кăмăллакан “Санпа çеç” юрăна иккĕшĕ пĕрле шăрантарчĕç.