13 мая 2008 г.
2008 çул — Çемье çулталăкĕ. Çавна май хамăрăн йăх-несĕл тымарĕпе интереслентĕм эпĕ. Манăн асатте, Василий Алексеев, Çавалçырма ялĕнче çуралнă. Вăл Енĕшкасси, Чатукасси шкулĕсенче вĕреннĕ, “Герой” колхозра, шкулта водитель пулса ĕçленĕ. Асанне Римма Алексеева Итмарта кун çути курнă. Вăл Арçунакасси, Чатукасси шкулĕсене çÿренĕ. Асанне Чатукассинчи, Енĕшкассинчи лавккасенче сутуçăра, Чатукасси вăтам шкулĕнче поварта ĕçленĕ. Кайрантарах колхозра вăй хунă. Вĕсем 5 ача пăхса ÿстернĕ. Аслă хĕрĕ — Алина — халĕ Йĕпреç районĕнчи Вăтаел ялĕнче пурăнать. Чатукасси вăтам шкулне вĕренсе пĕтерсен вăл педагогика училищине çул тытать. Алла диплом илсен пĕр вăхăт Чатукассинчи “Чебурашка” ача садĕнче — воспитатель, Чăваш патшалăх педагогика университетĕнчен вĕренсе тухать, Йĕпреç районĕнчи “Аист” ача садĕнче ĕçлеме тытăнать. Манăн атте, Юрий Алексеев, Чатукасси вăтам шкулĕ хыççăн Чăваш патшалăх педагогика университетĕнче вĕренсе аслă пĕлÿ илет, 11 çул хушши Çĕрпÿ районĕнчи Ункăçум шкулĕнче физкультурăпа пурнăç хăрушсăрлăхĕн никĕсĕсен учителĕнче ĕçлет. Иккĕмĕш хĕрĕ, Ольга, Чатукасси вăтам шкулĕ хыççăн Шупашкарти медицина училищине пĕтерет, халĕ вăл психиатри больницинче медицина сестринче ĕçлет, Хурăнлăх ялĕнче пурăнать. Лиля аппа вара Чатукасси вăтам шкулĕнче аттестат илсен Г. Лебедев ячĕллĕ лицея, унтан Ф. Павлов ячĕллĕ музыка училищине пĕтерет, пĕр вăхăт Сĕнтĕрвăрринчи шкулта музыкăпа вĕрентет. Халĕ вăл предприниматель. Кĕçĕн хĕрĕ, Наталья, Г. Лебедев ячĕллĕ лицейра вĕренет. Кайран вăл та Ф. Павлов ячĕллĕ музыка училищинчен вĕренсе тухать. “Анат Чулхула Газпром трансгаз” ООО филиалĕн — Заволжски ЛПУМГ клубĕнче ташă хореографĕ пулса ĕçлет. “Раштав” юрă-ташă ансамблĕнче тăрăшать. Ĕçленĕ хушăрах патшалăх педагогика университетĕнче вĕренсе аслă пĕлÿ илет.
Манăн кукаç, Алексей Титов, Çĕрпÿ районĕнчи Ункăçум ялĕнче çуралнă. Вăрçă хыççăн вăл Выççăлккăри, Виçикассинчи шкулсенче вĕренет. Кайран Çĕрпÿ районĕнчи “Богатырь” колхозра водительте ĕçлет. Манăн кукамай, София Титова, Çĕрпÿ районĕнчи Шурçырма ялĕнче кун çути курнă. Хĕр чухне вăл Шупашкарта çĕвĕçĕре тăрăшнă. Яла таврăнсан фельдшерпа акушер пунктĕнче санитаркăра, кайран вара тăван хуçалăхра ĕçленĕ. Вĕсем 4 ача пăхса ÿстерсе ура çине тăратаççĕ. Аслă ывăлĕ, Владимир, Çĕрпÿ районĕнчи Ункăçум шкулне пĕтернĕ хыççăн Шупашкарти автошкулта вĕренет, трактор тăвакансен заводĕнче водительте вăй хурать. Аслă хĕрĕ, Алевтина, Шупашкарти экономикăпа техника колледжне пĕтерет. Халĕ вăл Пенси фондĕнче ĕçлет. Кĕçĕн ывăлĕ, Юрий, Шупашкарти автошкула пĕтерет те таксипе пассажирсем турттаракан предприятире ĕçлет. Шупашкарта пурăнать. Кĕçĕн хĕрĕ — манăн анне. Вăл Ункăçум, Чатукасси шкулĕсенче пĕлÿ пухать. Алла аттестат илсе Шупашкарти экономикăпа техника колледжне пĕтерет те Чатукасси ял тăрăхĕнче ĕçлеме тытăнать, паянхи кунчченех унта вăй хурать. Эпир Выççăлккă ялĕнче пурăнатпăр. Пурăнма аван, ялĕ улăхра вырнаçнă. Эпĕ Чатукасси вăтам шкулĕнче вĕренетĕп, вĕренÿ отличници. Игорь шăллăм Чатукассинчи ача садне çÿрет. Эпĕ телейлĕ çемьере пурăнатăп.