08 мая 2008 г.
Çĕр улми — “иккĕмĕш çăкăр” тесе ахальтен каламан çав халăхра. Кăна Карай тăрăхĕнче тахçанах ăнланнă. Çавăнпа çулленех унăн лаптăкне ÿстерсе пынă. Тухăçлă çĕр улми çитĕнтерсе, хуçалăх унран пысăк тупăш курнă. Кăçал та карайсем “иккĕмĕш çăкăра” 80 яхăн гектар лартса çитĕнтерме палăртнă. Çак кунсенче кунта хĕрсех çĕр улми лартаççĕ. Геннадий Фоминпа Олег Иванов малтан пĕрремĕш бригадăра ăна 19 гектар лартса хăварнă. Халĕ (эпир ку тăрăхра район администрацийĕн ял хуçалăх пайĕн начальникĕпе Юрий Петровпа майăн 5-мĕшĕнче пултăмăр — автор) вĕсем Çырмапуç бригадине куçнă. 60 гектар лаптăкри çĕре Константин Фоминпа Эдуард Иванов тата Сергей Степанов механизаторсем культива-торсемпе лайăх кăпкалатса тухнă.
— Виçĕм кун ку бригадăра çĕр улми лартма пуçăннă, — тет К. Фомин механизатор. — Çĕр улми касакансем нумайăн мар та вăрлăх килессе кăшт кĕтме тивет...
Акă, кăнтăрла çитеспе çĕр улми тиенĕ машина килсе чарăнчĕ те картофелесажалка ещĕкĕсене вăрлăх тултарчĕ. Кĕç агрегатсем, пусă тăрăх шуса, малалла кайрĕç. Степан Васильевпа Юрий Архипов сеяльщиксем çĕр улми мĕнле варăнса пынине тимлĕн сăнаса пыраççĕ. Юрий Сергеев водитель агрегатсене минераллă удобренипе тивĕçтерсе тăрать. Евгений Петровпа Николай Федотов тата Радик Кузьмин вара — çĕр улми вăрлăхĕпе.
— Тепĕр енне тухма 700 метр пулать. Каймалăх пур, — тет О. Иванов тракторист. — Çĕнтерÿ кунĕччен вĕçлесчĕ...
Механизаторсем хăйсен ĕçĕпе кăмăллă. Ирхи 8 сехетрен пуçласа каçхи 8 сехетчен ку уйра ĕç шавĕ тăрать.