08 мая 2008 г.
Вăрнар районĕнчи Хурапыр Юнтапа ял хĕрĕ 1978 çулта Канашри педагогика училищинчен вĕренсе тухнă, малтан Ишлейри ача садĕнче, унтан Красноармейскинчи “Теремок” ача садĕнче воспитательте ĕçленĕ. 22 çул иртнĕ çапла.
Нина Николаевна хăйĕн ĕçне аван пĕлсе çитнĕ, пĕчĕккисем юратнă ăна, ашшĕ-амăшĕ те хисепленĕ. Çакна унăн ĕçне вĕрентÿ пайĕ Хисеп грамотипе чыслани те çирĕплетет.
Красноармейскинче ĕçленĕ чухнех вĕсем Карай ен каччипе — Виталий Петровичпа — çемье чăмăртанă. 3 ача çуратса ÿстернĕ, халĕ вĕсем — хăйсем çемьеллĕ. Чаховскисен 3 мăнук ÿсет.
2000 çулхи нарăс уйăхĕн 7-мĕшĕ те асрах-ха Нина Николаевнашăн. Çав вăхăтран вăл халăхăн социаллă ыйтăвĕсене тивĕçтерекен центрта вăй хума тытăнать. Ватăсен социаллă ыйтăвĕсене килте тивĕçтерекен уйрăм заведующийĕ кунта ĕçленĕ хушăрах аслă пĕлÿ те илет. Унсăрăн епле-ха? Ватăсемпе ăшă кăмăлпа, çепĕçреххĕн сăмахлама пĕлмелле вĕт. Тĕрĕс мар каласа хуни ветеран чун-чĕрине мĕн ĕмĕрлĕхех амантма пултарать. Çакна лайăх пĕлет Нина Николаевна, ăна ĕçре тĕпе хурать те. Ытахальтен мар-тăр ватăсем хисеплеççĕ кăмăллă çак хĕрарăма, ăшă сăмахсемпе тав тăваççĕ.
Иртнĕ уйăх пуçламăшĕнче Н. Н. Чаховская пурнăçĕнче паллă кун пулчĕ, çур ĕмĕрхи юбилейне паллă турĕ вăл. Çемье, тăванĕсем, çывăх çыннисем, кÿршисем, ĕçре юлташĕсем Нина Николаевнана ырă сывлăхпа вăй-хăват сунчĕç, парнесем кÿчĕç. Чăваш Республикин Сывлăха сыхлас ĕç тата социаллă аталану министерстви вара унăн ĕçне пысăка хурса Хисеп грамотипе чысларĕ. Кăшт каярах пулсан та, эпĕ те Нина Николаевнана юбилей ячĕпе саламлатăп, ватă çынсен ăшă сăмахĕсене куллен тивĕçме пархатар сунатăп.