08 мая 2008 г.
Тÿлеме тытăннă
РФ Правительствин 2007 çулхи чÿк уйăхĕн 3-мĕшĕнчи 741-мĕш йышăнăвĕпе килĕшÿллĕн ирĕке йышăнакансене Шупашкарта укçа тÿлеме пĕрремĕш хут пуçланă.
Сăмах кунта ĕçпе тивĕçтерекенсем страхланă уйрăм çыннăн пенсийĕн пухăнса пыракан пайне йĕркелеме Пенси фондне куçарнă взнос çинчен пырать. Гражданин ĕç пенсийĕн пухăнса пыракан пайне памалла тăвиччен вилсен çав укçана ирĕке йышăнакана тÿлеççĕ. Çын вилнĕ кун тĕлне унăн лицевой счечĕнче пенси валли пухăннă укçапа пĕрле ăна инвестициленипе пулнă тупăша та параççĕ.
Сывă та таса чухне гражданин пенси валли пухăнса пынине пайлас пирки Пенси фондне заявлени çитернĕ тĕк унта кăтартнă çынсем ирĕке йышăнакансем шутланаççĕ. Çырса пĕлтермен пулсан вĕсене саккунпа палăртаççĕ: пĕрремĕш черетрисем — вилнĕ çыннăн ачисем, мăшăрĕ, ашшĕ-амăшĕ, иккĕмĕшĕсем — пиччĕшĕ-шăллĕ, аппăшĕ-йăмăкĕ, аслашшĕ-асламăшĕ, кукашшĕ-кукамăшĕ тата мăнукĕсем.
Кăçалхи пĕрремĕш кварталта РФ Пенси фончĕн Красноармейскинчи управленийĕ страхланă çынсем вилнĕ хыççăн пенси валли пухăннă укçана ыйтса çырнă 6 заявление йышăннă.
Пенси валли пухăннă суммăна тивĕçес йĕркепе тата заявленипе пĕрле мĕнле документсем тăратассипе сайтра паллашма пулать. Унăн адресĕ: www.gov.cap.ru. Управление пырса тивĕçлĕ консультаци илме те май пур.
Инвестици ыйтăвĕ
Пенси фончĕн Шупашкар хулинчи управленийĕнче пулас пенсин пухăнса пыракан пайĕн укçи-тенкине инвестицилес пирки 2008 çулта заявлени йышăнма тытăннă. Граждансем унăн суммине тĕрлĕ майпа ÿстерме пултараççĕ.
1. Пенси валли пухăннă укçа-тенке йĕркелесе тăма Пенси фончĕпе килĕшÿ тунă управляющи компанисенчен пĕрне суйласа илсе çакăн пирки Пенси фончĕн хăйсем пурăнакан вырăнти управленине заявлени памалла.
2. РФ Пенси фончĕ урлă хăйсен ĕç пенсийĕн пухăнса пыракан пайне йĕркелеме килĕшменни çинчен пĕлтерсе обязательнăй пенси страхованийĕ енĕпе ĕçлекен патшалăхăн шутланман пенси фончĕсенчен пĕрне суйласа илсе унпа килĕшÿ туса РФ Пенси фончĕн управленине заявлени çитермелле.
3. Ĕç пенсийĕн пухăнса пыракан пайне йĕркелеме маларах суйласа илнĕ патшалăхăн шутланман пĕр пенси фондне хирĕçлесе патшалăхăн шутланман тепĕр фонда куçас тесен юлашкипе килĕшÿ туса РФ Пенси фондне заявлени памалла.
4. Ĕç пенсийĕн пухăнса пыракан пайне маларах суйласа илнĕ патшалăхăн шутланман Пенси фончĕ урлă йĕркелеме килĕшмесĕр РФ Пенси фондне куçасси пирки Пенси фончĕн управленине çырса пĕлтермелле.
Страхланă çын Пенси фончĕн управленине заявление пырса пама е хăй алă пуснине нотариуса çирĕплеттерсе почтăпа е курьерпа, е РФ Пенси фончĕпе алă пуснине икĕ енлĕ çирĕплетесси пирки килĕшÿ тунă организацие çитерме пултарать. Унпа пĕрле паспорт тата обязательнăй пенси страхованийĕн свидетельствине кăтартмалла.
Амăшĕн капиталĕ — 271250 тенкĕ
Федерацин 2008 çулхи тата 2009–2010 çулсенчи планлă тапхăрăн бюджетне улшăнусем кĕртнĕ 2008 çулхи пуш уйăхĕн 3-мĕшĕнчи 19-мĕш саккунпа килĕшÿллĕн амăшĕн капиталне ÿстернĕ. Патшалăх сертификачĕн бланкĕнче малашне çĕнĕ виçе кăтартаççĕ. Ку сумма маларах панă документсемшĕн те вăйра тăрать.
Амăшĕн капиталĕпе ача çуралнă хыççăн виçĕ çултан усă курма юрать. Унăн виçи çулсерен пысăкланать — çакна саккунпа çирĕплетнĕ. Тÿлеве ачасене вĕрентме, хваттер условийĕсене лайăхлатма е амăшĕн пулас пенсийĕн пухăнса пыракан пайне пуянлатма ярассине пĕлтерсе заявлени панă кун тĕлне çирĕплетнĕ виçепе танлашмалла.
Амăшĕн капиталне чи малтан 250 пин тенкĕ палăртнă. 2008 çулхи кăрлачăн 1-мĕшĕнчен сертификатсенче çĕнĕ сумма кăтартнă — 267500 тенкĕ. Халĕ — 271250 тенкĕ.
Паянхи кун тĕлне Красноармейски районĕнче çемье капиталĕн 122 сертификатне панă, çав шутра 2008 çул пуçланнăранпа — 44.