08 мая 2008 г.
Карайри хăвăрт утас енĕпе тĕнче класлă спорт мастерĕ А. Григорьев икĕ хутчен Тĕнче кубокне хутшăннă. Анчахрах пирĕн корреспондент Анатолий Николаевичпа курнăçнă, унран интервью илнĕ.
— Анатолий Николаевич, Эсир хăш-хăш çĕр-шывсенче иртнĕ Тĕнче кубокне хутшăннă тата вĕсенче мĕн асра юлчĕ, вĕсем çинче кăшт чарăнса тăмăр-ши?
— Малтанах 1990 çулта АПШри Калифорни штатĕнчи Сан-Хосере иртнинче вăй виçме тивĕç пултăм. Унта 84 çĕр-шыв çăмăл атлечĕсем хутшăнчĕç. 50 километрлă дистанцие стартран 364-ăн тухрăмăр. Эпĕ финиша малти ушкăнпа çитрĕм.
Тĕнче кубокĕнче иккĕмĕш хут 1992 çулта Мексикăри Монтеррей хулинче тупăшнăччĕ. Унта та 50 километра утнă, 21 е 22-мĕш вырăн йышăннăччĕ. Тĕнче кубокĕнче пирĕн çĕр-шывран ман хыççăн 50 километра утакан çын пулман.
АПШри Сан-Хосере иртнĕ Тĕнче кубокĕ ĕмĕрлĕхех асра юлчĕ. Ăна питĕ çÿллĕ шайра йĕркеленĕччĕ. Унта эпĕ хăйне май герой пулса тăтăм. 50 километра утнă кун сулхăнра 38—39 градус ăшă тăратчĕ. Эпир пĕр çичĕ спортсмен ыттисенчен самай малта утса пыраттăмăр. Куратăп кукăра пĕр пĕчĕк ача тухрĕ. Ман пуçра çав вăхăтра “кăна таптаса вĕлеретпĕр-иç” текен шухăш вĕçсе илчĕ. Хайхискер ун патнерех çитеспе ыттисенчен иртсе, ачана аяккалла йăтса тухрăм. Унтан малтисене хăвалама пуçларăм. Судья ман хыççăн, тем кăтартса хăлаçланать. Курса тăракансем судья эп утмалли техникăна пăснă тесе асăрхаттарма тăнине курсан, ун çине сиксе ÿкнĕ. Хайхине лару-тăрăва ăнлантарнă… Çав тĕлтен миçе хут иртмерĕм пулĕ, кашнинчех “Григорян, Горбачев, Перестройка!” тесе мана алă çупса кĕтсе илсе ăсатрĕç.
— Тĕнче Кубокне лекесси мĕнле пулса тухрĕ. Çав вăхăта кăшт та пулин каялла таврăнсамăр, Анатолий Николаевич?
— Эпĕ 1989 çулта СССР Кубокне çĕнсе илтĕм, çĕр-шывăн пĕрлештернĕ командин йышне лекрĕм. 1990 çулта 20 километрлă дистанцире СССР чемпионĕ ятне çĕнсе илтĕм. Икĕ хутчен Олимпиадăна лекмелли çĕртех, тĕрлĕ сăлтавсем тупса, унтан пăрса хăварчĕç. Вăл çулсенче эпĕ каярахпа виçĕ хут Олимп чемпионĕ пулнă Роберт Корженевскирен (Польша) 20 километрлă дистанцире 1 минут та 40 çеккунт выляса илтĕм. Çапла вара Олимп вăййисене хутшăнма шăпа пÿрмерĕ мана.
— Çапах та Эсир хăвăра телейлĕ тесе шутлатăр-и? Спорта пула Эсир тĕнчери вуншар çĕр-шывра пулса курнă, тивĕçлĕ ятсем çĕнсе илнĕ, тĕнче класлă спорт мастерĕ пулса тăнă тата ытти те.
— Çапла, эпĕ 20 ытла çĕр-шыври вуншар хулара пулнă, Европăрисене вĕсене шута та илместĕп. Францире пĕр канмасăр 22 сехет те 46 минут утнă, ку — тĕнче рекорчĕ, ăна хальлĕхе никам та çĕнетмен-ха.
— Анатолий Николаевич, хăй вăхăтĕнче Эсир Тĕнче кубокĕнче вăй виçсе Трак тăрăхне çÿле çĕклерĕр, халĕ, авă, Людмила Архиповапа Эдикт Хайбуллин Сирĕнтен эстафета йышăнчĕç темелле. Вĕсемпе те мăнаçланма пулать вĕт.
— Паллах. Иккĕшĕ те ырă сăмахсене тивĕçлĕ, вĕсем район ятне ямĕç тесе çирĕп шанса тăратăп тата Людăпа Эдикта çĕнĕ çитĕнÿсем сунатăп.
Чăваш Енĕн тĕп хулинче хăвăрт утакансен Тĕнче кубокĕ черетлĕ хут хăçан пуласси паллă мар, çавăнпа та майăн 9—11-мĕшĕсенче Шупашкарта иртекен Тĕнче кубокне кайса курма, хамăр тăрăхран тухнă Людмила Архиповапа Эдикт Хайбуллина ку ăмăртура çитĕнÿ тума тăвăллăн хавхалантарса тăма хутшăнма чĕнетĕп сире, ентешсем.
— Анатолий Николаевич, хăш-хăш спортсменсемпе Эсир çав ăмăтусенче туслашма ĕлкĕрнĕ тата халĕ вĕсемпе çыхăну тытатăр-и?
— Пĕрле утнисенчен халĕ чылайăшĕ тренерта вăй хурать. Ывăлăм, Алексей, Раççейри ăмăртусене тухса çÿрекелет те вăл-ку паллă спортсменсем салам каласа ячĕç тесе пĕлтерет вара киле килсен. Миша Щенников кашнинчех салам ярать. Бермудос (Мексика), Сидоти (Итали), Потапов (Украина), Попович, Франс Костюкевич (Белорусси), унпа Сан-Хосере (АПШ) гостиницăра пĕр пÿлĕмре пурăннă, тата ыттисене лайăх пĕлнĕ. Польша спортсменĕпе Роберт Корженевскипе питĕ туслăччĕ…
— Калаçушăн тавтапуç, Анатолий Николаевич, хăвăр пек пултаруллă спортсменсем хатĕрлес çĕрте Сире ырлăх-сывлăх пултăр.