08 мая 2008 г.
Пирĕн ял варринче палăк ларать. Ун тавралла пĕчĕк карта. Ăна тирпейлĕн кăвак сăрăпа сăрланă. Шалта хĕрлĕ, кăвак, сарă чечексем ешереççĕ. Вĕсене шкул ачисем пăхса ÿстереççĕ. Унăн çумĕпе иртнĕ чухне чун пăлханать.
Палăк çине мĕн чухлĕ ят çырса хунă. Пурте асаттесен тата аттесен ячĕсем. Вĕсем, пире валли телейлĕ пурнăç пултăр тесе, Аслă Отечественнăй вăрçăра хаяр тăшмана аркатса пуçĕсене хунă.
Кашни çулах Çĕнтерÿ кунĕнче палăк умне ачасем, ял çыннисем пуçтарăнаççĕ, унта чечек кăшăлĕсем хураççĕ. Вăрçăран таврăннă ватă çынсем çав хăрушă вăхăта аса илеççĕ те пуçĕсене усаççĕ. Вăрçă урăх ан пултăр тесе калаççĕ.
Эпир, ачасем, ку вырăна нихăçан та манмастпăр. Çак палăк умĕнче тăван çĕре ялан савма, асра тытма тата хăюллă та ĕçчен пулма тупа тăватпăр. Палăка шефа илетпĕр, хĕлле юртан яланах тасататпăр, çулла чечексем ÿстерме те манмастпăр.