08 мая 2008 г.
Валентина
Тăван ялта курнăçнă самантсем пирки çырасах килет. Хальхинче те шăмат кун, темиçе çынпа тĕл пултăм.
Калитке хуллен уçăлчĕ. Ман умра яланхиллех кăмăллă хĕрарăм курăнчĕ. Йăл кулăпа калаçать вăл. Яланхиллех таçта васкать.
— Лавккана çитсе килесшĕнччĕ те… Юрĕ-ха эппин… Сăмах çăмхине сÿтсе илĕпĕр иксĕмĕр, — тăруках тăпах чарăнчĕ Валентина Петровна Васильева. — Пурăнкалатăп хуллен…
Валентина салтак ачисен йышĕнче ялта. Ашшĕ Тăван Çĕр-шывăн Аслă вăрçине тухса кайнă чух çулталăкри ача пулнă. Ăна амăшĕ каласа кăтартнă тăрăх çеç пĕлет. Çав тери çепĕç чунлă çын пулнă ашшĕ. Ĕçе юратнă. Мăшăрне çав тери килĕштернĕ.
— Эпир аккапа — Розăпа — иксĕмĕр çуралнă. Урăх ача-пăча çук пирĕн. Ирсĕр вăрçă ура хучĕ ĕнтĕ. Атте фронтран час-часах çыру çырнă. Шел, юлашки çырăвĕ 1945 çулхи апрель уйăхĕнче пулчĕ. Хыпарсăр çухалчĕ çав манăн атте, — хаштах сывланине пытараймарĕ Валентина Петровна. — Хăрах çунат айĕнче ÿсрĕмĕр.
Чăнах та, амăшне çăмăлах килмен. Хуçалăхра та ĕçленĕ, ачисене те çитĕнтернĕ. Марье инке çине тăнипех Розăпа Валентина та ял-йышра ят-сумлă. Роза Петровна — ЧР тава тивĕçлĕ вĕрентекенĕ. Валентина Петровна тăван тăрăха куç хывнă. Тăван кил çурт сывлăшĕпе пурăнать. 18 çул Упири çыхăну уйрăмĕнче почтальонкăра вăй хучĕ.
Шел, мăшăрĕ — Николай Васильевич Васильев — пирĕн хушăра çук. Апла пулин те ачисемпе — Ларисăпа, Луизăпа, Сашăпа, Ваньăпа, Славикпе — хĕпĕртемеллипех хĕпĕртет амăшĕ. Татах та ытларах ултă мăнук çунат хушать.
— Кил-çурт тытма çăмăлах мар, паллах. Арçыншăн та ĕçлемелле. Пуртă-пăчкă алăран каймасть тепĕр чух. Халь, акă, анкарти ĕçĕсем пуçăнчĕç, — хăй шухăшне пытармасть Валентина. — Пурăнмаллах…
Килте укçа-тенкĕ пухмалли майсем шырать Валентина. Ĕне усрать, сĕт сăвать. Ăна сутни те çăмăллăх кÿрет хĕрарăма.
Район хаçатне те юратса вулать. Чи килĕштернĕ хаçатсенчен пĕри тесе шутлать район хыпарçине.