05 мая 2008 г.
Упи вăтам шкулĕнчи виçĕ ача Янмурçин ялĕнчи пушă пĕр çурта чÿрече çĕмĕрсе кĕнĕ, япаласем илсе тухнă. Район администрацийĕн çула çитмен çамрăксемпе тата вĕсен прависене хÿтĕлессипе ĕçлекен комиссин черетлĕ ларăвĕнче вара вĕсем хăйсен айăпне пĕтĕмпех йышăнчĕç тата ÿкĕннине пĕлтерчĕç. Ачасем кĕçĕн тата вăтам классенче вĕреннĕрен ларура амăшĕсен те пепкисене тивĕçлĕ воспитани пама çине тăманшăн пичĕсене хĕретме лекрĕ, асăрхаттарса хăварчĕç вĕсене. Виçĕ “тусăн” киревсĕр ĕçне сивлерĕç ларура, 7-мĕш класа çÿрекен арçын ачана комиссире учета та тăратрĕç.
Ларура кунпа пĕрлех Пикшик тăрăхĕнчи пĕр ялти хĕрарăма ачисене воспитани парас ĕçрен пăрăннăшăн амăшĕн правинчен хăтарас ыйтăва пăхса тухрĕç. Ĕçе вырнаçнă май вара икĕ çамрăка вăтам шкулта вĕренекенсен йышĕнчен кăларчĕç.