05 мая 2008 г.
Трак чăваш-нимĕç гимназийĕнче, йăлана кĕнĕ йĕркепе, кашни кунах мĕн те пулсан çĕнни пулса иртет. Кунти çамрăксем вĕренÿпе спортра та, канупа общество ĕçĕнче те хастар. Çакна юлашки хыпарсем те аван çирĕплетеççĕ.“Чи класлă класс ертÿçи”
конкурсра гимназист-педагогсем кăçал та ырăпа палăрчĕç. Виçĕ ушкăнри класс ертÿçисем З. К. Ласкеева (кĕçĕн), И. А. Ананьева (вăтам), А. П. Порфирьева (аслă) районти ăмăртăва хастар хутшăнчĕç. Вĕсем “Кашни вĕренекене уйрăм аталантармалли” программа çырса хатĕрлерĕç, унăн презентацине хÿтĕлерĕç, класс сайчĕсене йĕркелерĕç.
З. Ласкеева (3 “а”) тата И. Ананьева ( 7 “б” класс) ăстасем районта хăйсен ушкăнĕсенче çĕнтерчĕç, ”Чи класлă класс ертÿçисем” ята тивĕçрĕç. Земфира Константиновна вара республикăри ăмăртăва та хутшăнчĕ.