05 мая 2008 г.
Супар ытти чăваш ялĕсенчен нимĕнпех те уйрăлса тăмасть. Çурчĕсем те, çыннисем те çавăн пекех. Анчах та тинкеререх сăнаса пăхсан, мăнаçланмалли тĕслĕхсене асăрхама тата вĕсем пирки ыттисене каласа пама пулать. Çак тĕллевпех Супар ялĕнче çуралнă П. П. Павлов çинче чарăнса тăрасшăн. Халĕ вăл тĕп хуламăрта, Шупашкарта, пурăнать.
ЧР Президенчĕ Н. Федоров 2008 çула Ырă ĕçсен çулталăкĕ тесе çирĕплетрĕ.
Акă, нумаях пулмасть, Петр Павлович Супарти тĕслĕх вулавăш валли 1 комплект кĕнеке парнелерĕ. Хисеплĕ ентешĕмĕр 1929-мĕш çулта çуралнă. Истори наукисен кандидачĕ, доцент, хăйĕн пĕтĕм кун-çулне, вăй-халне ÿссе çитĕнекен ăрăва тарăн пĕлÿ, çирĕп воспитани парас çĕре янă. П. Павлов — РФ Журналистсен Союзĕн членĕ. Истори, чĕлхе тематикипе республикăри хаçат-журналсенче тăтăшах пичетленет. Вырăсла та, чăвашла та çырать. Хальтерех парнеленĕ комплекчĕ 8 кĕнекерен тăрать: “Пĕр тымарти ăрусемпе халăхсем”, “Авалхи вăтам Ази Сапар — чăваш çĕр-шывĕ пулнă”, “Арабсем те Саба (Сабар) — чăвашсенченех пулса кайнă”, “Сабар — чăваш чĕлхи — тĕнче чĕлхи”, “Америкăна Сабар-чăвашсем уçнă”, “Чăвашсем “тинĕс халăхĕсем” пулнă”, “Амазонкăсен çĕр-шывĕ — чăваш ен пулнă”, “Салтак шăпи”. Хисеплĕ тавра пĕлÿçĕ тăван тăрăхăн иртнĕ пурнăçĕпе кăсăкланать, историллĕ нумай очерксен авторĕ.
Ака уйăхĕн 25-мĕшĕнче чăваш чĕлхипе литература эрнине халалласа вулавăшра унăн кĕнекисенчен те куравăш йĕркелерĕмĕр. “Сабар чăваш чĕлхи — тĕнче чĕлхи”. Унта “Чăваш чĕлхи хăçан тата мĕнле пулса кайнă?”, “Чăвашсем — Месопотами (юханшывсем хушшинчи е вĕсен çывăхĕнчи айлăм çĕрсене каланă) супарĕсем”, “Араб чĕлхи — сабар — чăваш чĕлхи пулнă” тата тем те пĕр çинчен пĕлме пулать.
Пултаруллă çыравçăмăрăн кĕнекисемпе Супарти вулавăшра çывăхрах паллашма пултаратăр.