05 мая 2008 г.
Чувашская резьба по дереву. — 182 с. Авторĕсем — Г. Н. Иванов-Орков, П. Я. Мазуркин. Кăларăма чăвашсен тĕп ĕçĕн — йывăçсем касса эрешлессин историне тата хальхи аталанăвне халалланă. Халăх маçтăрĕ П. Мазуркин хăйĕн пурнăçĕн 30 ытла çулне çак ырă йăлана аталантарас çĕре панă.
Кĕнекере “Халăх маçтăрĕсен опытĕнчен” ярăм пур. Вăл “Мастер çул-йĕрĕ”, “Мастер çурчĕ”, “Мастер канашĕсем”, ытти пайсенчен тăрать. Кунта сăн ÿкерчĕк чылай вырнаçтарнă. Кĕнеке тиражĕ — 2000 экземпляр.
Чувашская спортивная энциклопедия. — 398 с. Авторĕ — Н. Г. Скородумов.
Кĕнеке Чăваш Енри физкультурăпа спорт юхăмĕн аталанăвĕн историйĕ, паллă спортсменсемпе тренерсем, ирĕклĕ спорт обществисем, спорт тĕсĕсем, вĕренÿ заведенийĕсем, ача-пăчасен спорт шкулĕсем çинчен каласа парать, унта 1600 статья кĕртнĕ, 400 сăн ÿкерчĕк (120-шĕ тĕрлĕ тĕслĕ) вырнаçтарнă. “Чăваш Республикин тава тивĕçлĕ тренерĕсем” пайра эсир пирĕн пултаруллă ентеш-тренерсем — В. Н. Григорьев (Енĕшкасси), М. М. Мефодьев (Супар) çинчен вуласа пĕлме пултаратăр. “Раççей чемпионачĕсен, ăмăртăвĕсен чемпионĕсем, çĕнтерÿçисем, призерĕсем” пайра ирĕклĕ майпа кĕрешес енĕпе спорт мастерĕн кандидачĕн ятне тивĕçнĕ Олеся Григорьева ( Красноармейски ялĕ) пирки çырнă.
Çак кĕнекесемпе эсир районти тĕп библиотекăра паллашма пултаратăр.